WORCESTER.- MLB Pipeline a presentá su lista adaptá di e tòp mihó 100 prospektonan den liga Menor. Esaki despues ku na kuminsamentu di temporada nan tabatin un vershon kaba di e lista di e 100 mihó prospektonan kaba. Mester bisa ku e YDK Ceddanne Rafaela un biaha mas ta den e lista aki di e mihó prospektonan. E biaha aki Ceddanne ta paresé na di 78 lugá riba e lista aki di e tòp mihó 100 prospektonan. Esaki ta nifiká ku e YDK a subi no ménos ku ocho lugá pa loke ta trata e promé lista ku MLB Pipeline a publiká e aña aki. Huntu ku esaki Ceddanne awor ta e di tres mihó prospekto di e organisashon di Red Sox. Unikamente Marcelo Mayer i Roman Anthony ta mas haltu kuné riba e lista, pa loke ta trata prospekto di Red Sox. Ceddanne e temporada aki a kombiná den Dòbel A i Tripel A pa un promedio di 303 ku 17 honron, 67 kareda empuhá i 34 base roba den 93 wega.
