WILLEMSTAD.- Krus Korá Kòrsou ta bai tin un evento den wikènt benidero pa nan rekoudá fondo pa asina por kaba di konstruí nan edifisio nobo na Suffisant. Un kandela feros a destruí e edifisio di Rode Kruis na Suffisant dia 28 di yüni 2020 i awor mester di e fondonan pa por kaba ku konstrukshon.
Direktiva di Krus Korá Kòrsou ku presidente, sr. Alfred Palm na kabes, a para ketu na e 92 aña di eksistensia ku e organisashon a kumpli riba 18 di mei último. Sr. Palm a sigui splika e tareanan importante ku e organisashon ta desplegá pa komunidat di Kòrsou, manera kursonan di EHBO, asistí komo paramédiko den aktividatnan públiko, kondusí programanan humanitario manera a hasi den e pademia di covid ku a yuda 12.000 kas di famia, i nan ròl di paramédiko i di shèlter na momentu di un orkan òf un kalamidat.
Krus Korá Kòrsou ta konta ku 3 sentro, di kua Suffisant ta esun prinsipal, ku ta duna e espasio rekerí pa e reunionnan di nan 140 boluntarionan por tuma lugá den kuadro di e tareanan di e organisashon. Den e opservashon ku e desaroyonan sosial –ekonómiko ta bayendo atras riba nos pais, Krus Korá Kòrsou ta antisipá riba e nesesidat di yudansa sosial na komunidat i ta pone énfasis riba e importansia pa kaba e sentro na Suffisant, pa asina por kumpli ku e funshon aki.
E edifisio ta rekerí un invershon di Fl. 2.7 mion di kua Krus Korá Kòrsou a logra sera Fl. 2.2 mion for di nan reservanan i tambe di lokual nan a risibí di seguro di e edifisio bieu. E organisashon ta hasi un apelashon na pueblo di Kòrsou pa sostené e kousa aki i hasi un donashon pa logra sera e sobra Fl. 500 mil ku falta pa kaba e edifisio, ku segun skema ta planiá pa kaba 15 di desèmber próksimo.
Gerente general sra. Maisy Scharbay tambe a hiba palabra i a hasi un invitashon na pueblo di Kòrsou en general pa partisipá na e torneo ‘fundraising’ di gòlf ku lo tuma lugá djasabra awor 27 di mei na Emmastad i tambe na e mediatòn pa rekoudá fondo pa e edifisio di Suffisant, ku lo tuma lugá djadumingu awor 28 di mei, di 12 or di mèrdia pa 10 or di anochi riba Brionplein.
Durante e téletòn lo por hasi donashon físikamente den buzon òf mashin di swaip. Por hasi donashon tambe via di nan boluntarionan, nan kuenta di banko MCB2004 òf yamada na nan ‘call center’ 9365, na kualke momentu deseá.
E téletòn ta keda sostené pa diferente organisashonnan boluntario ku ta hasi e evento aki posibel i lo konta ku animashon di Armando Huerta, Rignald Maduro i agrupashonnan musikal. E dia lo ta unu di famia ku lo konta ku diferente presentashon i demostrashonnan interesante, ku lo keda di ‘livestream’ riba pantaya grandi na Brionplein i transmití pa diferente medio di komunikashon.
fotonan
…Riba e fotonan momentu di e rueda di prensa kaminda Krus Korá Kòrsou a presentá e aktividatnan di wikènt benidero pa rekoudá fondo…
