ACCRA (AFP).- E kasamentu na Ghana di un lider religioso di 63 aña ku un mucha di 12 aña a provoká un ola di indignashon i yamadanan pa detenshon dje pastor den e pais aki den wèst di Afrika.
E religioso, Nuumo Borketey Laweh Tsuru XXXIII, tambe konosí komo Gborbu Wulomo, djasabra a kasa ku e hóben, mediante un seremonia tradishonal.
Polis i outoridatnan na un promé instante a deklará ku e mucha tin 12 òf 13 aña, pero outoridatnan ku tabata na e seremonia a menshoná 16 aña. Na Ghana, e edat mínimo legal pa kasa ta di 18 aña.
“Parse ku nos ta bai komprendé vários kos. Por ehèmpel, ku e edat di 12 aña ku nan a bisa ta algu falsu. E mucha tin kasi 16 aña… e ta menor”, segun e minister di Asuntunan Religioso, Stephen Asamoah Boateng.
Riba retnan sosial a publiká potrèt i filmashon dje seremonia, loke a generá hopi rabiamentu serka aktivistanan di derechinan di mucha.
“Estado mester aktua di forma inmediato”, segun Oye Bampoe Addo, aktivista i eks-minister ganes. “Loke a kaba di pasa, ta un delito i ta ilegal”, el a agregá.
Ministerio Públiko a habri un investigashon i a bisa ku kisas a kometé un “infrakshon penal”.
Pa defendé e matrimonio, e bosero dje pastor a duna di konosé ku e pareha no por tin relashon seksual te na momento ku e hóben tin edat pa esei, pues, 16 aña. Pero, e no a bisa kuantu aña e mucha tin.
“No ta un seremonia di kasamentu. E kos aki no tin nada di hasi ku sèks. E pastor tin tres kasá. Ta trata di un papel tradishonal ku ta yuda e pastor den su debernan spiritual’, segun e bosero Mankralo Shwonotalor a duna di konosé.
