WILLEMSTAD.- E korant ‘Nederlands Dagblad’, ku ta un di e korantnan mas importante pa hende kristian na Hulanda, djasabra último a publiká un artíkulo tokante ‘sklabitut mental’ na Kòrsou. Pa e artíkulo periodista Marina de Haan a papia entre otro ku diferente persona, entre dos pastor riba nos isla. Segun e artíkulo e pasado di sklabitut te ainda tin un influensia grandi na Kòrsou. Periodista De Haan den e pasado a bishitá nos pais hopi bia. Durante su último bishita na Kòrsou el a entrevistá entre otro Welton ‘Papi’ Esprit, pastor na e iglesia New Song. E ta bisa ku ‘pasado di sklabitut’ (slavernijverleden) ta un problema hopi grandi na Kòrsou, pero tambe ‘presente di sklabitut’ (slavernijheden). “Si bo no ta konosé bo historia, otro hende ta guiá bo dor di nan historia. I si otro hende ta guiá bo den un kultura ku no ta di bo, bo no sa mes di bo identidat.” Segun pastor Esprit esaki ta e problema kardinal awendia na Kòrsou. “Na un dado momento den historia nos desaroyo a stòp. Niun hende a siña nos ken nos ta i kiko nos por yega. Esaki tin su efekto te awor. Mentalmente te ainda nos ta katibu.”
Periodista Marina de Haan tambe a papia ku Louis de Bode, ku ta e promé pastor femenino di Anglican Episcopal Church, e iglesia anglikano na Kòrsou. E ta bisa den e artíkulo ku hopi hende no por imaginá nan mes e impakto grandi ku pasado di sklabitut te ainda tin den nos komunidat. De Bode mes ta desendiente di katibu. Den e último añanan el a hasi investigashon na historia di sklabitut riba nos isla. Tambe el a papia hopi ku otro persona, entre otro ku desendiente di sklabitut, tokante e historia di sklabitut. Komo konsekuensia di esaki awor e ta mas serka di su mes, De Bode ta splika. I tambe mas serka di e spiritu di otro desendientenan di sklabitut riba nos isla, i pafó di nos isla.
Segun De Bode herensia di sklabitut te ainda ta visibel den e outo-imágen negativo ku hopi desendiente di katibu tin. E ta mira e herensia den kustumber di hende, lenga, músika i kuminda. “Riba tur tereno bo ta mira ku hende ta wòrdu ménos apresiá a base di nan kolo di nan kueru i etnisidat. Lamentablemente nos por konkluí ku te ainda hende ta haña ménos oportunidat den bida a base di nan kolo di kueru.” Esaki tin ku stòp, segun De Bode.
Segun pastor Esprit lidernan spiritual tin un ròl importante pa ban sklabitut mental. “Nos mester krea un manera di pensa nobo. Komo pueblo nos tin ku realisá ku nos mester ta mas konsiente. Nos tin un balor grandi!”
