Errin Dorand ; di AGO pa HBO
Pa yega leu den estudio no tin barera. For di un estudio abou pa subi bai te esun mas haltu ta posibel pa esun ku ke. I ta den e kuadro aki EXTRA Djasabra e siman aki ta dediká e entrevista aki na Errin Dorand ku huntu ku direktor/ko fundadó di Instituto Buena Bista Tirzo Martha a trese e desaroyo aki. Errin ta un hóben di 22 aña, e ta outista. El a sali di skol di fundeshi (LOM) i a sigui pa AGO. Di AGO el a drenta Instituto Buena Bista i próksimamente Errin lo sigui su estudio na Hulanda.
IBB i e hóben ku “gedrags problemen”
Manera Tirzo Martha a splika, nan di IBB tin eksperensia den traha ku hóbennan outista i tambe ku ADHD. El a bisa ku den tur e añanan, nan tabatin diferente hóben ku outismo, ADHD i tur e otro nòmbernan ku ta duna na ‘Gedrags problemen’. Loke nan ta hasi ta unu hopi personal ta dirigí nan mes direktamente riba e individuo i asina logra haña mas bista riba kiko nan por i kiko nan no por. Nan nesesidat i forsa i asina traha un plan pa nan sigui desaroyá, I e guia ei no ta solamente di focus riba aki na Kòrsou pero tambe duna e guia pa ora nan bai sigui studia. Ta wak kua skol nan ta bai pasobra den kaso di outismo no tur akademia tin e guia spesial aki i ta wak mas aleu kiko tei pasa despues ora nan kaba skol i kon por yuda nan pa sigui desaroyá, E ta dependé hopi di e individuo mes tambe. Nan a ripará por ehèmpel ku un kaso ku nan tabatin ku un hóben ku ADHD kon a bai sigui studia i a logra su master i awor aki e ta biaha rònt. Tirzo ta hopi orguyoso di esaki pasobra nan a desaroyá un konfiansa propio serka e mucha. E mucha mes ta desaroyá e konfiansa den su mes pa sigui funshoná. I hopi bia durante di nan estudio IBB ta sigui yuda ku e aspekto ei pa e konfiansa propio ei.
Importante pa laga tèst bo yu
E otro pida ta ku ta yuda nan desaroyá komunikashon. Komuniká ku hende papia, duna informashon, reakshoná, duna opinion pasobra einan ta importante pa nan sinti ku nan ta parti di e diálogo den komunidat i den skolnan, kiko nan soño ta entre otro. El a bisa ku si un hende ta bisa un hóben ku un di e komportashonnan ei, ku e lo no logra, lógikamente esei ta su referensia i lo no logra. Pero dikon no pensa ku ta bai purba tòg. I e purba eksperensia ei nan di IBB ke sòru pa e hóbennan aki ku ADHD òf outismo haña e yudansa. I p’esei ora nan detektá i señalá ku e hóben ta outista, ta papia ku e mayornan mesora pa laga tèst e yu. Tirzo a bisa ku e tèst ei ta di sumo importansia i mayornan no mester tene bèrgwensa di dje. E ta importante pa e yu haña bon guia pasobra asina ei lo sa kon ta dil ku e mucha. I si e mucha tin te asta 18 aña ta bon pa hasié, pa por guia e yu, pa e por logra.
Errin; di un hóben ku no ta komuniká pa un hóben ku ta papia so
Pa loke ta Errin, Tirzo a konta su eksperensia ku Errin ora el a drenta IBB te ku awe ku e ta bayendo di IBB despues di 5 aña. Pa Tirzo tabata un momentu di hopi alegria ora Errin a kuminsá papia. E parti negativo ta ku el a papia i no ke stòp (joke). E kos mas bunita ta ku Errin a drenta IBB hopi ketu i den su mes. Poko poko a kuminsá papia ku Errin. E ta un hóben strak i serio i Tirzo ta keda papia kuné pa e wak e humor den su mes i den su trabou. Dado momentu a yega na e punto kaminda no ta bai solamente di mentalidat kon ta para ku loke bo ta hasi òf ke hasi pero kon tin di desaroyá esaki. I e desaroyo aki ta e pida ku a hasi Tirzo mas kontentu ta ora Errin a kuminsá skibi su kosnan, hasi pregunta, pensa den su historia kiko e ke konta. I asina a tin e trankilidat ku Errin por. Despues wak kon ta hasi kada detaye fuerte serka Errin. E pida ei IBB a trata pa e ta parti di e grupo kaminda nan por komentá ku otro. Kaminda nan por duna komentario riba otro su trabou, ta mas habrí pa ku komentario di otro i na e pida ei por mira ku Errin a bira super sosial. E mes ta bai papia ku e otro koleganan studiante.
Loke e ta hasi tin balor
E kos importante tabata pa mira ku Errin mes a kuminsá komprondé ku loke e ta hasi tin balor i kon desaroy’é. Errin ta traha pòpchi chikí di teip i el a kuminsá hasi e pòpchinan mas grandi. I asina tur e detayenan ei a mustra ku Errin a kuminsá haña kurashi te awor por mira su atelier ku yen kos. Promé e tabata traha kos chikí i awor grandi. E desaroyo den e añanan ku a pasa tabata bunita pa eksperensiá i bunita pa mira ora e mester a hasi su Toelating, no tabata un hóben ku ta duda pero firme. Den Errin su kaso, nèt ora e mester a hasi su Toelating, skol na Hulanda a bin ku e tin di partisipá den un workshop online. Na promé instante nan a pensa ku e ta klap sera pero a resultá kontrali, Errin tabatin mas kurashi ku nunka. Errin a bin di AGO i tin hende por pensa ku ta un nivel abou ku no ta unu di un HAVO pero e ambishon pa traha ta pusha bu ku bo kalidat i nivel ta pusha bu na e nivel ku bo mester ta, i un toets asina a mustra ku un hende rápidamente por a logra esaki. E urgensia pa desaroyá su mes tabata hopi fuerte.
E gana di entrevistá Errin
Komo Mama di Errin, Valesca, presentadó i produktor di e programa Djasabra semper tabatin gana pa un dia e por entrevistá Errin, komo un ehèmpel di un mucha di AGO i ta bai drenta HBO. El a splika ku no tur mucha outista ta meskos pero e kos importante ta ku tur mama tin di rekonosé ku e yu ta outista ora e kaba di tèst i duna e yu guia. I nos a puntra Errin lo siguiente;
Kon bo ta deskribí bo mes?
Errin; Mi ta deskribí mi mes den área di arte ku mi ta traha kos. E pòpchinan mi kier a traha algu di mi so. Ora mi tabata chikí semper mi tabata kumpra pòpchi di otro hende i semper mi a pensa ku mi ke traha algu di mi mes pa mi tin mas kontròl. Mi gusta e aspekto di kontròl den arte ku mi tin básikamente,
Bo sa kiko ta outista?
Errin; Un mucha outista ta básikamente diferente ku otro. Tin mucha ku no por pone atenshon i ta slou. Ami ta hopi slou por ehèmpel den rekenen i mi tin problema di sinta. Semper mi e ‘struggle’ na otro skolnan ku mi tin problema pa keda sinta sino mi ta pega soño. Mi tin di keda move bai bin pa keda lantá.
E skolnan ku bo a bai promé ku IBB nan a komprondé ku bo no por keda sinta?
Errin; Mi ta pensa ku nan no a echt komprondé pasobra ta asina nan ta. Nan sistema ta ku bo tin di sinta pa lès. Na IBB mi a ripará mesora ku ta diferente. Aki bo por sinta aki i aya òf para. Na IBB no tin problema ku esei i e lès ta sigui normalmente.
Kiko ta iritá bu mas/kiko ménos bo ta gusta?
Errin; Mi no ta gusta sinta hasi nada pasobra den mi kabes esei ke men ku mi ta kla pa drumi i p’esei mi gusta move hopi. Gewon sinta i wak nada mi ta kuminsá pega soño.
Hende ta komprondé bu?
Errin; Si, mi ta haña ku nan ta komprondé mi i asta nos ta hasi joke riba dje. Tin mucha ta saka mi potrèt i mustra mi kon mi ta para na e muraya te aya banda pa purba keda lantá.
Kiko bo a gusta na IBB?
Errin; Loke mi a gusta ta kon mi ta sinti mi na kas. Mi a sinti mi un lugá manera kasi bo por biba. Aki tin tur kos, tin hende pa bo papia kuné. E kos ku mi a gusta mas ku na otro skolnan ta e muchanan pa papia kuné i na IBB e ta mas mihó. E kos ku mi gusta den skol di arte ta ku mi por papia di e ideanan di kiko nos ta bai traha riba dje.
Ki dia bo a kaba na IBB?
Errin; For di aña pasá mi a kaba IBB. Mi mester a hasi algun kos manera tarea pa e skol Willem de Kooning i mi a pasa esei kaba. I komo mi ta slou den rekenen mester a hasi e 21+tèst i tabatin yen rekenen den dje i mi a struggle hopi den dje. Mi mester a bai lès serka otro hende pa siña mi esei. Den promé mi a hasié den hulandes tambe. I e 21_+ tèst a tene mi un aña mas na IBB. Téknikamente mi no tin di bin skol pero mi gusta akinan. E energia ku mi tin aki no ta meskos ku e skolnan bieu ku mi a bai.
Bo ta kla pa bai Hulanda;
Errin; Si, mi ta pensa ku mi ta basta kla pa bai Hulanda. Mi ta spera ku lo mi bai sinti falta di Kòrsou. Lo mi bai pa basta largu. Mi sa kon e bida na Hulanda ta. Mi tin e bon idea ku lo bai ta friu.
Kiko bo ta gusta mas den arte?
Errin; Mi gusta e manera ku bo ta mustra bo mes ideanan. Mi tabatin kombersashon ku Tirzo pasobra hopi bia nos ta purba hasi algu ku segun nos ta original pero e kos original ta e ehekushon. Hopi hende por tin mesun idea pero loke ta laga nan keda original ta e manera ku nan ta ehekutá e idea ei i esei mi ta gusta di arte. Mi gusta kon mi ta ehekutá mi ideanan.
Kiko a yuda bu komo outista pa bo a yega asina leu?
Errin; Tin hopi kos a yuda mi. Antes lo mi a papia kiko ku ta di mi mente pero na IBB mi a siña kiko si por bisa i na kua momentu. I si mi ta hasi algu ku ta laga e mucha otro sintié inkonfortabel mi ta pidié pa e bisa mi pa mi no hasié. Tambe mi a bai otro institutonan manera Savaanhuis, Rancho Harmonia, nan a yuda ‘shape’ mi. Rancho Harmonia a yuda mi hopi kon mi por sosialisá ku otro hendenan. Einan ta bai hopi mucha kasi meskos ku mi i mesun problema ku mi.
Bo ta sinti ku hende ta tenta bu pa bo forma?
Errin; Mi no ta wòri asina tantu. Tin bia mi ta wòri pero hende no a tenta mi hopi. Antes e muchanan por a bisa ko’i kèns di mi pero mi no a wòrdi masha ku eseinan.
Konsientisá e hóben
Errin; Mi ta bisa ku IBB ta bon lugá ku por yuda bu den áreanan di kreatividat pasobra bo por hasi hopi kos aki, muzik, sine, pintamentu, eskultura i hopi mas. Nos tin un podcast ku nos ta hasi i einan ma bisa ku mi gusta eksperimentá. Mi a gusta eksperimentá ku opheto pa saka zonido.
