WILLEMSTAD.- Durante tratamentu di e kaso di asesinato ku a tuma lugá na Seri Papaya dia 19 di mei último, kaminda e víktima J.A. Lloyd di apénas 20 aña a keda likidá ku 15 bala rònt su kurpa, den balkon di su kurá, mama di e defuntu ku tabata sintá den sala, a ekspresá su mes bou di lágrima i hopi emoshoná. Segun e señora, fo’i dia ku su yu a keda likidá e no ta e mesun hende mas. El a splika ku su yu tabata un hopi speshal pe i ku e tabatin e mashá na su kurason. Su yu tabata esun ku tabata kushiná pe i hasi tur kos, apesar ku e tabata mankaron na man i pia. P’esei e tin hopi doló, pasó e no por komprondé dikon a mata su yu. E señora a sigui bisa ku fo’i chikí el a lidia ku su yu, pa motibu di su hèndikèp. Segun e señora e dia ei su yu tabata drumí riba kama band’i dje, pa motibu ku e tabata malu, pero direpente a lanta i bis’é ku e ta bai bin. Ora el a puntra su yu, unda e ta bai, ku un kara tristu su yu a bira wak e i sigui kana bai. Despues di un ratu, e ta tende zonidonan bala ku te awe a keda den su kabes. El a bisa ku anochi e no por drumi pasó e ta keda tende e zonidonan di bala. Mas aleu e señora a duna di konosé ku tabatin momentonan ku e no kier a ni biba mas, pasó e no tabata sa kiko hasi ku e dolónan ku e tabata sinti pa su yu. El a bisa ku e ta kansá di e asuntu di arma aki na Kòrsou ku ta keda usá den tur problema. Niun hende no ta diskutí ku boka mas, tur hende ta usa arma pa atendé ku problema. Na momento ku e señora a bisa esaki, un ruman hòmber di e víktima a grita den públiko na e akusado, dikon e mester a usa arma en bes di a enfrente man ku man si ta pa problema. ‘P’esei bo no por bira wak mi den mi kara”, segun e ruman hòmber di e víktima na e akusado. Aki e akusado a bira wak e ruman hòmber i keda wak e stret den su kara.
E polisnan ku tabata den sala pa órden públiko, a saka e ruman hòmber pafó di sala inmediatamente pa evitá lo peor. Na momento ku e ruman hòmber di e víktima tabata saliendo, el a bisa e akusado ku nan lo topa un dia. Mama di e víktima a sigui bisa, ku su yu a bai laga dos yu menor atras ku tur dia ta puntra pa nan tata. El a bisa e akusado ku e sa ku e no tin mama mas i p’esei semper el a yam’é papa.
Na final e señora a yama wes danki pa a dun’é e chèns di desogá su mes. Riba e pregunta di wes na e akusado, kiko e tin di bisa di loke e mama di e víktima a duna di konosé, e akusado a splika ku e tambe tin duele pa loke a pasa ku yu di e señora, pero e no ta esun ku a kometé e krímen pasó e no ta hende di e kosnan ei.
Pa loke ta trata e tiroteo riba polis ku e akusado a kometé riba miembronan di e tim di aresto momento ku nan a bai pa arest’é, wes a puntra e akusado kon e por a tira riba polis i si e no ta hende di e kosnan ei, kon bini e tabatin un arma. E akusado a kontestá ku e sistema ku polisnan a bin riba dje, a pone aktua asina i e tabatin e arma pa motibu ku e tabatin yen problema. E kaso a keda posponé pa dia 1 di mart kaminda lo bai trata esaki den su kontenido.
