WILLEMSTAD – No a drenta fin di siman ofisialmente ainda ku ya kaba outoridatnan mester a atendé vários kaso den oranan di mardugá, kandela, inval i atrako den kas di hende i aksidente. Primeramente bomberonan mester a duna dos asistensia. Unidat di brantwer di Rio Canario i Mundu Nobo mester a bai na e skol bandoná, Kolegio Erasmo den Muizenberg ku ya no ta den funshon.
Esaki tabata den Kaya Havana unda un parti di e daño tabata den interior di e edifisio. Vários unidat di branspùit mester a akudí na e sitio pa dominá e kandela i pa esaki no ekspandé aun mas tantu. No ta konosí e motibu eksakto di e kandela pero mirando e estado bandoná i vários saku di sushi den e lokal no ta deskartá e posibilidat ku chòlernan por a sende esaki. Mas mainta bomberonan mester a sali duna asistensia pa un otro kandela. Esaki a kuminsá ku un kandela di mondi ku a bin pega un kit den un kura di kas den Tinweg na Janwe. A logra dominá esaki rápidamente pa asina no forma niun peliger mas. Brantwer di Steenrijk a bai na e sitio aki
Kasi na mes momentu tabatin dos entrada hudisial relashoná ku investigashon pa atrakonan kometé pa algun hóben. Tabata e tim di UST (Unit Speciale Zaken) huntu ku Tim di Atrako ku a ehekutá e entradanan hudisial aki. Unu tabata na Gato unda a logra pone man riba un hóben i despues na Jandoret tambe a logra detené otro hóben.
Tambe outoridatnan mester a bai na un kas den Kaya Amatista pa un kaso di atrako. Un mama huntu ku su yunan a bira víktima den e kaso aki na momentu ku e atrakadornan a eksihí yabi di e outo i a logra di bai ku esaki. E víktimanan a keda hopi konmoví pa e atrako aki na momentu ku e kriminalnan drenta den e kas. Henter e famia a keda hopi spanta i tabata yora. Sigur lo mester bai duna asistensia di profeshonalnan pa trankilisá e famia aki despues di e sustu enorme ku nan a pasa aden.
Tambe den oranan di mardugá polis i ambulans mester a bai duna asistensia pa un aksidente riba Schottegatweg Nort na altura di Pòmp di gasolin Buena Vista nèt den e bògt. E señora shofùr lo a pèrdè kontrol i bai dal den un muraya i bòltu. E víktima a risibí algun leshon i a keda transportá pa hospital pa mas tratamentu. E outo a risibí basta daño material.
