Dia 01 mei 2023, ta lansa pa promé bia Friends of Mount Pleasant Market, kaminda un grupo di empresario lokal ta bai lansa i promové nan negoshi.
Marina Kirindongo i Terrence d’Aguiar ta di fundashon Friends òf Mount Pleasant. Ta trata di un fundashon ku ta organisá aktividatnan pa asina por krea fondo. Awor ta dirigí riba empresa lokal. Nan sa ku ti hopi hende ta lanta nan negoshi pero e parti pa haña sosten ta masha poko. Nan no tin e fondo pa hasi esaki i den e kuadro aki e fundashon pa yuda otro persona krese. Marina Kirindongo mes tin su empresa Dahlia’s Art & Creations i e tin eksperensia ku no ta fasil pa komo empresario chikí lanta i haña promoshon pa bo negoshi i asina haña kliente.
Difísil pa propagá
Marina a splika kon difísil esaki ta pasobra bo ta invertí pa yega na e material i yega na e produkto pero e propaganda si kos ta kai chikí. Hopi bia nan ta hasié via media sosial pero no ta haña e hende manera mester ta. I den e kuadro aki e idea pa bin ku un merkado pa duna oportunidat na empresarionan pa eksponé nan produkto i asina por haña atenshon di públiko. E fundashon tei basta tempu pero awor nan ta besig ta pushando esaki bek.
Eksponé empresario i logra fondo
Terrence na su turno a splika ku meta di e fundashon ta netamente pa organisá eventonan manera den e kaso aki eksponé empresarionan chikí. Yuda otro i bai mas leu pa yuda mamanan soltero, muchanan ku mester di yudansa kisas ku material di skol. Tin diferente aspekto ku e fundashon ke pone atenshon riba dje pero pa esaki mester krea fondo. Nan ta krea fondo kaminda empresarionan tambe tin benefisio di dje dor di merkadea nan mes i nan di e fundashon tambe ta krea fondo pa nan proyektonan. Terrence a splika ku na kuminsamentu di anja eskolar bo ta haña hóbennan tin falta di kisas un tas, buki, kosnan simpel pa por bai skol i ounke ta kosnan nesesario. I p’esei nan ke krea fondo. Meskos ku fin di anja nan ke yuda algun famia i mas por yuda mas mihó. Un kaminda nan ke kuminsá i no ta importá kon chikí e ta pero importante pa sigui dal e pasonan.
Merkado den naturalesa
I tur esaki ta meta di e proyekto/merkado di dia 1 di mei awor. Loke por spera ta prsonanan ku ta bin eksponé nan arte, otronan ku ta duna servisio manera masashi, hende ku ta drecha galeria, personanan ku ta habri nan butik i ta lansa esaki na e okashon aki, benta di asesorio, paketenan spesial, tin un huki i kuminda, kuido di kueru i kurpa i asta tin 2 opvang pa e bishitantenan por laga nan yunan i nan por kana den e merkado. I e opvang aki lo mustra kiko nan por ofresé. Praktikamente tur stent ta yena i no ke haña demasiado stent tampoko. Tur kos lo sosodé en ambiente plasentero i pa tin un bista di kiko ta ofresé. Intenshon ta pa haña 25 stent total. E vishon ta pa e merkado krese i bira mas grandi.
Falta di privilegio p’esun lokal
E empresario lokal hopi bia tin di lucha un tiki mas duru ku esun mas grandi. Terrence a bisa ku tin diferente aspekto i esei ta ku e empresario chikí ta difísil pa krese pasobra kosta di hasi negoshi na Korsou ta hopi haltu na Korsou. E empresario ku ta bin di afó hopi bia ta haña algun privilegio ku esun lokal no ta haña. Por ehèmpel Tax Holiday 10 anja na 0 %.Otro pais tambe ta duna Tax Holiday pero e e porsentahe ta baha gradualmente segun e empresario ta kresiendo. Pero di esnan lokal ta eksihí pa nan paga tur kos pa motibu ku e kosto di hasi negoshi ta haltu e ta stroba e empresario lokal. Merkadeo por ehèmpel e empresario lokal ta lucha kuné pasobra e tin di kita for di e tiki ku e ta gana. I ounke e merkadeo ta importante pasobra e ta supos di haña mas kliente pero e empresario chikí tin miedu di invertí sèn den algu ku e no ta sigur di dje, ounke segun Terrence hasimentu di negoshi ta un rísiko. E empresario chiki ke mitiga su risiko pa no hasi sierto moveshonnan na momentu ku e no ta haña esaki nesesario.
E lucha
I den e kuadro aki mester bin mas insentivo pa e hende lokal ku ke kuminsá ku su negoshi. Marina a splika den e kuadro aki ku d su mes eksperensia kiko e ta pasando aden pa por ehèmpel haña spònser pa e parti di prensa pa eksponé nan merkado. I p’esei e por komprondé kon e empresario chikí tin di lucha i hopi bia no ta logra manera e ke.
Por spera mucha mas
Esaki ta e promé paso pa e merkado di dia 1 di mei i nan lo sigui despues. Tin yen posibilidat pa hasi pero nan ke pa ta algu ku tin akohida i nan ke presente asina tambe. I den e kuadro aki ta interesante tambe e paso pa kapasitá i rekapasitá e empresario ku ke habri su negoshi. Sinembargo awor aki nan ta konsentrá riba loke ta eksistente. Ounke ta importante pa organisá tayernan por ehèmpel di kon ta traha un plan di negoshi. Terrence a bisa ku un lucha na Kòrsou ta ku asina e hende kuminsá ku su negoshi i kuminsá gana sèn ya e ta kuminsá planea fakansi ets ets miéntras ku ta besig ta komiendo for di e sèn pa hasi negoshi.
Programa
Pa loke ta e programa di dia 1 di mei, esaki ta di 10 or di mainta pa 4 or di atardi i ta sosodé na Mount Pleasant riba kaminda di bai Bullenbaai. Riba e dia ei por kome for di desayuno serka nan. Tin eksposishon di arte, masashi i hopi mas. Mayoria empresario ti nan produkto disponibel pa hasi uso di dje einan. Entrada ta solamente 1 florin ku ta pa rekoudá fondo pa e proyektonan ku ta bai sigui. A tene e gastunan di partisipashon tambe abou pa asina por kubri kostonan. A tene e gastu abou pa e empresario por partisipá.
Djòin pa krese
Hasimentu di negoshi no ta fásil ounke e por bira fásil na momentu ku e aliansa ku tin di forma i e sosten di un ku otro. Marina a bisa ku na Kòrsou hopi bes ta wak otro komo kompetensia i no ku un por komplementá otro. Mester djòin pa asina krese. Por mira esaki si den otro kulturanan pero tòg e yu di Korsou ta no ta sostené su mes kompatriota.
