ZAPORIYIA, UKRANIA, AFP.- Rusia na punto di apoderá di e haf di Mariupol, despues di simannan di bombardeo, a mantené su preshon militar riba e parti di Ukrania aki, ku a risibí un sosten fuerte di Union Oropeo , desidido pa hasi tur loke por pa e èks repúblika soviétiko gana e guera kontra Mòsku.
“Bosnan no ta bosnan so. Nos ta huntu ku bosnan i nos lo hasi tur loke ta posibel pa apoyá bosnan esfuerso i hasi ku Ukrania gana e guera”, asina e presidente di konseho oropeo Charles Michel a bisa den un rueda di prensa ku presidente ukraniano Volodimir Zelenski.
“Na Kiev awe, den e kurason di un liber i demokrátiko”, asina Michel a skibi riba Twitter. “E historia lo no lubidá e krímennan di guera”, kometé pa trupanan ruso, asina el a bisa anteriormente na Borodianka, un di e siudatnan devastá, serka di e kapital.
E yegada di Michel ta konsedí ku un intensifikason di e ofensivo ruso na sùit i ost di Ukrania ku ta resistí e invashon pa dos luna kaba. E departamento di defensa merikano a indiká ayera ku Ukrania a risibí di su aliadonan piesanan pa su avionnan, pero no avionnan di guera kompletu, manera a informá anteriormente.
Noruega a informá di a manda un kantidat di misil antiaéreo, miéntras ku Washington ta prepará un pakete di yudansa militar di 800 mion dòler, ménos ku un siman despues di anunsiá otro pa e mesun kantidat ei.
Evakuashon
Miéntras tantu e kaminda pa evakuá sivilnan di e siudatnan di Mariupol no a funshoná, asina e vise promé minister ukraniano Iryna Vereshchuk a bisa kende a akusá trupanan ruso di a violá e paro di kandela i a blòkia e vehíkulonan.
“Desgrasiadamente, e koredor humanitario di Mariupol no a funshoná manera nos a kere”, asina Vereshchuk a bisa kende den oranan di mainta a anunsiá u akuerdo preliminar ku Rusia pa establesé un koredor humanitario pa promé bia, for di djasabra pasa.