WILLEMSTAD.- Durante aña 2022 sektor di restorant na Kòrsou tabatin problema pa haña sufisiente personal na nivel. Te ainda segun asosashon di restorantnan ta nesesario pa haña personal djafó ku por suavisá e situashon, asina Martin den Dulk, bosero di “Koninklijke Horeca Nederland” aki na Kòrsou a duna di konosé. Resientemente “Koninklijke Horeca Nederland” a reuní ku ministerio di SOAW tokante esaki, buskando un solushon miéntras ku no tin personal aki na Kòrsou. Mester tene na konsiderashon ku covid-19 a dal e sektor duru i hopi hende no ke traha den e sektor aki mas.
Den un entrevista sostené ku redakshon di Extra, Martin den Dulk a splika ku e problema ku tabatin den 2022, esta ku no por a haña sufisiente personal den Horeca, esaki lo sigui persistí den 2023, pa motibu ku no ta un problema ku por keda solushoná riba término korto.
Den afan pa buska un solushon pa e problemátika aki, “Koninklijke Horeca Nederland” ta na mesa ku CTB, Skolnan i otro “stakeholder” nan ku ta den e sektor di horeca, buskando un forma kon pa haña personal den horeca mas lihé posibel.
Awor aki huntu ku e partnernan menshoná, ta bai focus riba e tipo di personal i den un forma profeshonal lo ke yega mas lihé posibel pa yuda e sektor di horeca ku e personal nesesario.
Pa haña hende mas rápido pa e sektor, “Koninklijke Horeca Nederland” a sinta ku SOAW na mesa pa wak kon por trese managernan i otro profeshonalnan ku aktualmente no tin aki na Kòrsou. “Koninklijke Horeca Nederland” ta ferwagt ku nan lo haña e koperashon pa logra haña hende. E hendenan ku keda buská djafó ta pa tempu kòrtiku i mester yega na un akuerdo ku e pèrmitnan nesesario pa e trahadó por keda kla den kuater siman.
E hendenan ku lo keda buská lo yuda train e personal lokal pa yega na e nivel di profeshonalismo i tambe yega na kòkinan ku por okupá e puesto di shèf.
Manera menshoná, loke ta trata e interes di hendenan lokal pa traha den e sektor aki, den Dulk a splika ku covid-19 a hunga un ròl den esaki, i esaki a kambia e imágen di horeca.
Ta konosí ku e sektor di horeca ta e sektor ku a haña e sla di mas duru i hendenan ku tabata traha den horeca, no ke regresá.
Den Dulk ta di opinion ku mester bai drecha riba e imágen di horeca pa motibu ku e sektor aki ta sòru pa un satisfakshon bunita.
