GENEVA, SUISA, AFP.- Alrededor di 5.000 migrante ta detené den sentronan ofisial di detenshon na Libia, segun indikashon di e hefe di Organisashon Internashonal di Migrashon djárason.
“Esaki ta inaseptabel pa loke ta trata violashon di derechonan di e migrantenan den e pais. Nos a bisa bon kla ku detenshon no ta un solushon”, segun e direktor general di IOM Antonio Vitorino durante un konferensia di prensa organisá pa Nashonnan Uní na Geneva.
Libia a bira e ruta preferí di míles di migrantenan di Afrika despues ku e régimen di Gaddafi a kai na 2011.
Mayoria biaha ora migrantenan ku purba krusa Mediteráneo keda interseptá pa outoridatnan, ta hiba nan bèk na sentronan di detenshon na Libia. Regularmente Nashonnan Uní ta denunsiá e tipo di sentronan aki pa nan mal kondishon.
Italia ta e destinashon di eskoho pa mayoria solisitante di asilo di Norafrika, pero un lei nobo introdusí den yanüari a limitá barkunan humanitario pa realisá solamente un reskate i no múltiple.
Vitorino a bisa ku su agensia a reuní ku ofisialnan italiano luna pasa pa papia tokante e situashon pero no a duna mas detaye tokante e kombersashon.
