Mayra Coffie a bai sosegá

Riba dia ku Partido MAN ta kumpli 53 aña

WILLEMSTAD.-Un ratu pasá a drenta e informashon ku Mayra Coffie, gran polítiko di e pais aki a fayesé. Ta nèt riba e dia ku partido MAN ta kumpli 53 aniversario di kua Mayra Coffie pa 45 aña tabata miembro fiel. Nos di EXTRA ta korda sra. Coffie, ‘la pelirroja’ komo diputado i miembro di Konseho Insular skèrpi i fuerte.

Sekretario di partido MAN Yael Plet a konfirmá e informashon indikando ku e notisia aki ta unu hopi fuerte pa MAN i mas ainda pa e mes personal. Plet ta konta di su eksperensia ku Mayra Coffie den polítika, splikando ku su formashon polítiko pa gran parti ta danki na e guia di sra. Coffie. E señora semper ta kla pa yuda tur hende. Su konosementu i eksperensia semper e ta pone na disposishon pa yuda. Asta den momentunan difísil ku malesa a hunga un ròl Mayra Coffie no a sera su mes pa hende i a keda duna konseho.

Mayra Coffie ta un muhé balente, un eks diputado di Kòrsou ku semper a haña rèspèt pa su trabou di amigunan i kontrinkantenan polítiko. Den e polítika di ántes kaminda ta hòmbernan tabata manda Mayra Coffie tabata un muhé stret ku ta bisa i para pa loke e ta pensa. E echo ku e ta un hende muhé no a stroba Mayra Coffie di kumpli kabalmente ku su funshon i tareanan. Yael Plet ta kere ku e pais aki lo ta hopi bon si hendenan den polítika lo por aktua ku konvikshon i stret.

Despues di aña 2000 sra. Coffie a baha komo diputado i a bira presidente di MAN. E señora aki tabata pensa strategia. Semper e ta keda pensa kon por drecha kalidat di bida pa hendenan den komunidat. Mayra Coffie su palabranan tabata; Mientrastantu tin un hende pober den e pais aki, esei ta motibu ku un partido MAN mester tei. Miéntras tin un hende den e pais aki ta drumi anochi sin kome, MAN mester tei. Plet a sigui bisa ku asta den e joinmentu di lista di MAN ku PIN Mayra Coffie tabata puntra kon kosnan ta kanando i tabata duna konseho.

E misa ku partido MAN a pidi pa selebrá 53 aniversario ta sigui. Ademas lo dediká e misa tambe na honor di Mayra Coffie. Lo rekordá Mayra Coffie pa e kosnan grandi ku el a nifiká pa MAN i pa Kòrsou. Kondoler na famia i na partido MAN ku e pèrdida aki.