WILLEMSTAD.- Medical Laboratory Services (MLS) por mira bèk riba un wikènt eksitoso na Hulanda kaminda a partisipá na 2 evento. E promé tabata un Simposio di AMA titulá: “Back to the Islands” i e di dos tabata CARE Caribbean network event. Tur dos aktividat ta kontribuí na e kalidat di servisio ku MLS a kustumbrá di duna su klientenan.
MLS tin mas ku 30 aña di eksperensia brindando servisionan di laboratorio di kalidat na komunidat di Kòrsou. Pa mantené kontinuidat di e nivel di servisio akí, MLS a partisipá na e dos eventonan na Hulanda organisá dor di We Connect i Asosiashon Médiko di Antia (AMA). E dos organisashonnan akí tin kontakto ku yunan di tera ku ta studia na Hulanda den área di kuido i salú.
MLS su gerensia ta konsistí di yunan di tera ku a demostrá ku nos hendenan mes por. P’esei MLS a partisipá i ta stimulá e eventonan aki pa drenta den kontakto ku yunan di tera ku ta den e fase final di nan estudio òf ku a terminá nan estudio òf ku ta trahando kaba pa bin traha na Kòrsou. “Nos mes mester di e profeshonalnan aki na Kòrsou. Di e forma akí MLS ta demostrá e konfiansa ku nan tin den e yunan di tera pa forma parti di e organisashon i desaroyonan di MLS pa kontribuí na e kalidat di servisio ku MLS ta duna na e komunidat di Kòrsou”.
