WASHINGTON, AP.- Merka a anunsiá impuesto di 25% riba vários produkto importá di China, balorá na 50.000 mion dòler. China a reakshoná atvirtiendo ku lo apliká kastigunan komersial ekivalente den represaya na e produktonan merikano. E dos ekonomianan mas grandi di mundu ta den un krísis komersial.
E ministerio si Komersio di China agregá ku ta deshasiendo di e akuerdonan ku e pais a hasi ku Washington, den kòmbersashonnan dirigí pa desaktivá un disputa komersial generalisá.
Den un deklarashon, e ministerio chines no a duna detaye di kua produkto merikano lo wòrdu afektá, pero China a anunsiá posibel ophetivonan den aprel, entre otro riba soya, djus di apelsina, whiskey i karni di baka.
“E parti chines no kier start un guera komersial, pero kontra e desishon di Merka, China mester ataká ku forsa bèk”, asina e deklarashon a agregá. “Nos lo introdusí medidanan den e mesun eskala inmediatamente i ku e mesun porsentahe.
E reakshon di China a wòrdu anunsiá despues ku e gobièrnu di presidente Donald Trump a primintí di tuma medidanan drástiko nobo den kontesta na loke e ta yama práktikanan komersial inhustu di parti di China. Den un deklarashon djabièrnè, Trump a bisa: “Merka no por tolerá pa pèrdè nos teknologia i propiedat intelektual pa medio di práktikanan ekonómiko inhustu”.
