MERKA, AP.- Merka a pidi pilotonan ku bula riba òf rumbo pa Venezuela, pa tene prekoushon debí na disturbionan sivil.
Atministrashon Federal di Aviashon (FAA) a bisa ku no tin prueba ku ta indiká ku e militarnan venezolano kier ataká avionnan sivil, pero ku un eror ta posibel.
E atministrashon a agregá ku algun di e misilnan antiaéreo personal di forsa militar por kai den man di gruponan “ku mal intenshon i sin entrenamentu apropiá”.
FAA a emití e atvertensia djabièrnè pidiendo e pilotonan pa tene kuidou ku un altura di 7.925 meter òf ménos riba Venezuela.
Vários aerolínea a suspendé su buelonan pa e pais suramerikano segun e káos tabata oumentando. Pero tin algun ku ainda ta biaha pa e pais frekuentemente.
“Nos ta kontinuá ku biahenan pa dos aeropuerto di Venezuela i nos ekipo ta monitòr e situashon estrechamente ku FAA”, segun e bosero di American Airlines Ross Feinstein. E aerolínea tin buelonan diario di Miami pa Caracas i Maracaibo.
E atvertensia di FAA no ta prohibí aerolíneanan merikano di bula pa Venezuela. Normalmente e agensia sa prohibí buelonan pa Norkorea i seis pais mas.