BOGOTA, AP.- E gobièrnu di Merka a pone mas sanshon kontra polítikonan aliado di e gobièrnu di Nicolás Maduro i a pidi e paisnan latinoamerikano pa kongelá kualkier aktivo di petroli estatal venezolano, miéntras oposishon i nashonnan na fabor di un kambio polítiko den e pais ta batayá pa logra hinka e yudansa humanitario den e pais venezolano.
Departamento di Tesoro merikano a anunsiá mas sanshon kontra kuater gobernador venezolano aliado di Maduro.
E visepresidente merikano Mike Pence a partisipá den un reunion di grupo di Lima, ku el a eksihí salida inmediato di Maduro. Ademas, el a pidi pa realisá elekshon nobo na Venezuela. El a enfatisá ku kualkier kambio mester wòrdu hasí sin uso di violensia.
Den un deklarashon firma pa dies pais latinoamerikano, Grupo di Lima a indiká ku “e transishon pa demokrasia mester wòrdu ehekutá pa e venezolanonan di forma pasífiko, konforme Konstitushon i lei internashonal, sostené pa medionan polítiko i diplomátikonan, sin usa violensia”.
E paisnan ku a firma tabata Argentina, Brasil, Canada, Chile, Colombia, Guatemala, Honduras, Panama, Paraguay i Perú.
![](https://extra.cw/wp-content/uploads/2019/02/sanshon-2-300x200.jpg)