BOGOTA, AP.- Grupo di Lima, kual ta sostené e lider venezolano opositor Juan Guaidò, ta pidi elekshon nobo i un transishon demokrátiko sin uso di violensia. Ademas, e grupo a pidi pa retiro inmediato di presidente Nicolás Maduro.
Despues di un reunion di e bloke na Bogotá, e minister di relashon Eksterior di Colombia, Carlos Holmes Trujillo, a kritiká e echo ku Guaidó i su famia ta enfrentá menasa “serio i kreibel”. Si e menasanan wòrdu ehekutá, esaki lo kousa un reakshon internashonal kontra Maduro.
“Kualkier akshon violento kontra Guaidó, kontra su señora òf kontra su famia ta un krímen i lo obligá Grupo di Lima pa aktua kolektivamente, akudiendo tur mekanismo legal i polítiko”, asina e kansier a atvertí sin duna detaye tokante e kòmplòt.
E denunsia a tuma lugá na final di un reunion kaminda Guaidó tabata presente. El a yega Colombia djabièrnè huntu ku visepresidente di Merka, Mike Pence, pa papia tokante e krísis den Venezuela.
Grupo di Lima a emití un deklarashon di 18 punto kaminda e grupo a renobá su petishon na forsa armá venezolano pa rekonosé e lider opositor komo komandante. Ademas, e grupo ta pidi Korte Penal Internashonal pa konsiderá e blokeo di entrega humanitario di parti di Maduro komo un krímen kontra humanidat i ta pidi Nashon Uní pa tuma un ròl mas importante pa resolvé e krísis aki.
