WASHINGTON, AP.- E gobièrnu merikano lo retirá su 2.000 efektivonan di Siria, konsiderando ku e pais a triunfá den su mishon pa derota Estado Islámiko einan. Asina un fuente ofisial a informá djárason.
E plannan di retirada a kuminsá kaba i e sòldatnan lo kuminsá regresá mas pronto ku ta posibel, segun e fuente ku a pidi pa no wòrdu identifiká.
Presidente Donald Trump a bisa ku e efektivonan merikano no ta nesesario den e pais mas.
Desde ku e tabata kandidato, Trump a insistí ku e kier saka e militarnan di Medio Oriente. Pero vários funshonario den simannan resien a atvertí ku ainda Estado Islámiko ta enfoká riba algun pais árabe. E polítika merikano den añanan resien tabata pa mantené presensia militar den Medio Oriente te ora e milisia ekstremista wòrdu derotá.
Pentágono i otro fuentenan ofisial a revelá ku sòldatnan merikano ta den Siria pa kontrarestá e milisianan respaldá pa Iran, loke ta nifiká un ampliashon di e mishon militar original.
“Nos a derotá EI na Siria i esei ta e úniko motibu dikon nos tabata einan”, asina Trump a bisa riba Twitter despues di vershonnan di prensa ku Merka ta preparando pa retirá di Siria.
E revelashonnan abrupto a kousa krítika den Kongreso.
