BERLIN, AP.- E kansier aleman Angela Merkel a ninga di deskartá sanshonnan di Union Europeo kontra Venezuela, despues di a reuní djárason ku representantenan di oposishon venezolano.
E gobernante a reuní na Berlin ku Julio Borges, presidente di Asamblea Nashonal di Venezuela i Freddy Guevara, promé visepresidente di legislatura, segun informashon di ofisina di Merkel.
El a agregá ku e enfoke di e reunion tabata e situashon polítiko aktual interno di Venezuela, su
“situashon preokupante di derechi humano” i e deterioro di kondishonnan ekonómiko den e pais.
Merkel a primintí di sostené “e pueblo venezolano i tur forsa demokrátiko”. Su ofisina a bisa ku e kansier no a “deskartá sanshonnan di parti Union Europeo” pa purba haña un solushon pasífiko pa e konflikto.
E kansier a pidi gobièrnu di presidente Nicolas Maduro pa bolbe kuminsá ku negosiashonnan ku oposishon i kumpli ku su promesa di tene un diálogo nashonal na Venezuela.
E representantenan di oposishon Venezolano ta den un gira den Europa buskando sosten pa preshoná gobièrnu di Maduro. Djaluna, Borges i Guevara a reuní na Paris ku presidente Emmanuel Macron, kende a mustra dispuesto na impulsá sanshonnan nobo. Djamars nan a wòrdu risibí na Madrid pa presidente Mariano Rajoy i mañan nan mester papia ku e promé minister britániko Theresa May na London.
