No a kumpli ku kondishonnan
WILLEMSTAD.-Instituto di kuido Betesda ta pará dilanti di un situashon fèrfelu awor ku minister di finansa Javier Silvania ta pidi pa Bestesda paga bek e suma di mas ku 2 mion florin ku nan a haña na yüni 2023. EXTRA a tuma nota di esaki i a bai wak e dekreto ministerial a base di kua a regla e supsidio pa Betesda. E dokumentu aki ta indiká ku Betesda por hasi uso di e montante únikamente pa e puntonan menshoná den e dekreto. Pa mas tarda 30 di aprel 2024 nan mester duna kuenta i rason.
Ta bon pa splika ku e desishon pa duna e instituto di kuido e èkstra supsidio ta despues di vários petishon di Betesda na gobièrnu di Kòrsou. Den Hopi kaso e petishonnan no tabata haña aprobashon. Esaki ta pone ku e kuido na grandinan no por tuma lugá den forma optimal. Den e kuadro ei gobièrnu di Kòrsou a konsiderá ku kuido na grandinan mester tuma lugá na un manera efektivo. Ta p’esei a bai di akuerdo ku un supsidio pa un kaso eksepshonal.
Betesda a risibi Naf 2.013.000.-. E suma aki ta eksklusivamente pa atendé ku mantenshon atrasá di edifisio, kompra di material i kompra di un bus pa transporte. E supsidio aki ta kai pa e aña fiskal 2022 ku ta finalisá den 2023. Ministerio di finansa a depositá e suma ariba indiká for di yüni 2023 i Betesda tin te aprel 2024 pa duna kuenta i rason.
Riba pregunta di EXTRA dikon ta eksigí kuenta i rason for di awor e minister a bisa ku nan ‘ta monitor Betesda i lo ta notando ku e instituto no a hasi nada. Den e dekreto ta indiká bon kla den di término mester usa e sèn i na kiko. Betesda no a kumpli.” Mas aleu e mandatario ta indiká; ‘Nos no ta warda te 30 aprel 2024. Nos ta monitor wak si bestelling a tuma lugá, remodelashon a kuminsá. Betesda no a hasi nada.” Direktor di Betesda dr. Rog: ‘Nos a hasi petishon, si minister bisa no nos ta kumpli i ta kla”.
