Betesda tin te 8 mart pa entrega informe provishonal
WILLEMSTAD.-Gerensia di Betesda tin te 8 di mart próksimo pa entrega na gobièrnu un informe di e progreso provishon (tussentijdse voortgangsrapportage) dunando splikashon te kon leu a hasi uso di e supsidio èkstra di 2 mion ku Betesda a risibi na yüni 2023 ku tabatin destinashon konkreto. Esei EXTRA a tuma nota di dje un karta di minister Javier Silvania ku a bai pa gerensia di Betesda den persona di dr. Rog.
Manera EXTRA a informá for di ayera Minister Silvania a manda un karta dirigí na Betesda den kua e ta pidi pa depositá e 2 mion florin ku e instituto di kuido a risibí komo un supsidio adishonal. E dekreto di yüni 2023, tempu ku a duna e supsidio, ta stipulá ku mester usa e plaka aki spesífikamente pa atendé mantenshon atrasá na e edifisio i di koriente, na di dos lugá e mester sirbi pa kompra di material, manera inventario i sistema di komunikashon i na di tres lugá ta para ku Betesda ta kumpra un bus pa transporte. EXTRA a informa ku di parti di Betesda e direktor a bisa ku nan no ta keda sin kumpli, pero nan a manda pidi pa posponé e fecha pa duna kuenta i rason debí ku minister mes a manda proposishon pa Betesda tuma ‘kortdurende zorg’. Betesda lo kier a kaba di atendé esei promé mirando ku mester hasi sierto invershonnan pa akomodá e ‘kortdurende zorg’.
Minister Silvania den su karta di awe ta indiká ku e no ta bai di akuerdo ku e petishon di Betesda pa posponé e fecha riba kua mester duna kuenta i rason kon a usa e supsidio. E dekreto di e supsidio ta stipulá ku mester duna kuenta i rason mas tarda 30 di aprel 2024. Sin embargo minister Silvania ta eksigí un informe preliminar di Betesda mas tarda 8 di mart 2024. E minister ta bisa ku e intenshon di Betesda pa destiná parti di e fondonan na otro kos no ta aseptabel pasobra e supsidio di 2 mion ta predestiná. Komo tal si Betesda no kumpli mester depositá e montante bèk den kaha di gobièrnu.
