Ministerio Públiko a inougurá ayera e bùs di Ministerio Públiko ku ta drenta bario. Ayera e tabata stashoná na Mangusa Hyper Market. I awe nos tin Roderick Gouverneur bosero i Tanuysha Pieternella ‘team leider’ di Ministerio Públiko ku a splika nos detayadamente di kiko tur por ferwaktu di e bùs den bario. Manera Roderick a splika Djasabra, for di tempu di pandemia, hopi organisashon i nan mes a bai ku servisionan ‘online’. Por a hasi servisio ‘online’, via telefòn i e-mail. Pero tòg tin hende tin e drèmpel pa yega e ofisinanan di Ministerio Públiko i p’esei dikon no bai den bario. A yega na e bùs pa Ministerio Públiko Mas Serka Di bo, ku porsierto ta nan slogan. E bùs ta bai di Bándariba te Bándabou.
E bùs no ta bai buska pa detené niun hende
Tur e servisionan ku Ministerio Públiko ta duna no ta solamente kastigu i krímen. E bùs no ta bai den bario pa buska niun hende. E bùs ta pa e hende bai serka nan i tin e servisio di paga but ku kisas a haña den tráfiko i no mester bai te Waaigat, hendenan ku a hasi areglo di pago pa daño perhuisio, duna guia na víktimanan di por ehèmpel violensia relashonal òf atrako i tin kaso pendiente i ke sa kon e kaso ta andando. Tur ta kos ku por yuda e hende ku no mester bai te de Tempel òf Waaigat.
Servisio di bùs
Tanuysha a splika ku e idea di e bùs ta pa evitá ku e hende tin di kue bùs òf buska left pa bai serka nan, nan ta yega mas serka e hende pa tende nan inkietut. Ta duna e hende e oportunidat pa drenta areglo di pago òf tambe pa por paga daño perhuisio. Nan ta asistí tambe den situashon difísil kaminda e persona kisas no sa ku ta un kaso penal e ta bai bira i por aserka e kolaboradónan di e lokèt di víktima kaminda nan ta skucha i si no ta algu ku nan por yuda, lo dirigí e persona pa e instansia pa e haña yudansa. Mediashon tambe nan ta duna pero no den e bùs. Nan lo tende e hende si, tende inkietut den komunidat i despues lo kanalisá esaki. Pero por aserká nan na e bùs pa bisa kiko ta e problema.
Di Bándariba te Bándabou
E bùs lo bai di Bándariba te Bándabou. Tin bia un parti di dia un kaminda i mèrdia otro kaminda. Por ehèmpel ayera a lansa na Mangusa, pero lo bai para na misa, sentro di bario, plasa etc., etc.. Nan lo saka e skema i lo ‘update’ esaki via retnan sosial i einan o informá unda nan lo ta pará.
Kibra e tabú
I ku e bùs aki tambe segun Roderick, nan ta kibra ku e tabú entre komunidat i Ministerio públiko. Nan ke kita e miedu ku hende tin pa aserká OM. Ta normal si ku hende ta pensa asina pasobra OM ta konosí komo e instansia ku ta persiguí i p’esei nan ke kibra e drèmpel i pa mustra ku nan ta hende meskos ku tur otro hende. I p’esei nan ke yega e hende pa purba yuda òf dirigí na e instansia konserní. I no por keda sinta den de Tempel kere ku e hende ta yega serka di nan so pero ta desaroyá.
No mester traha sita
E bùs tin èrko paden kaminda e hende por sinta. Tin bia e bùs ta pa paga but i daño perhuisio i otro bia e bùs ta riba kaya pa lokèt di víktima i mediashon. Ta dos tipo di área ku por aserká e bùs. Si kisas nèt e dia ku e bùs ta den bario ta pa but pero e persona tin otro pregunta e por hasié i e koleganan ta pas’é pa ofisina i di einan ta tuma kontakto ku e persona. No tin mester di yama pa traha sita pero ta kuestion ta kana yega e bùs. Pero si ta besig ta pidi un tiki pasenshi i warda bùrt i asta risibí algu di bebe afó pa baha kalor.
I despues di e bùs den bario OM tin mas kos pendiente pa bin kuné. Nan ta semper bai pensa kon i kiko por hasi pa yuda pueblo mas tantu. E bùs ta e aña aki i segun nan sinta pensa nan lo bin ku mas servisio pa kibra e tabú ku nan tei pa sera hende so.
Konsientisá
Tambe Roderick a splika ku hopi hende ta kere tambe ku OM ta pa kobra but so pero esei no ta nan afan so, nan idea ta pa konsientisá hende di reglanan di tráfiko manera stòp di kore ku telefòn, faha di seguridat papel di outo. Un preokupashon grandi ku tin ta e kantidat grandi di hende ku ta kore outo sin reibeweis. Esaki segun Roderick ta e but mas frekuente ku nan ta eksperensiá na Paga bo But. Hopi kaso di aksidente ku morto ta resultá ku e hende no tabatin faha di seguridat bistí. Uso di alkohòl tambe ta algu frekuente den komunidat. I esaki tambe lo forma parti di e bùs esta programanan di konsientisashon pa hendenan ta mas sigur den tráfiko.
Hende ta pagando mas
Pa loke ta e komportashon di pago di but a kuminsá bira mihó. Hopi hende manera haña e but ta kore bai Waaigat pa paga mesora o ta puntra kuenta di banko pa transferensia. Areglo di pago tambe semper por hasi. Un bia pa luna tin e kasonan den korte pero si bo paga promé ku e kaso bai korte bo ta paga solamente loke tin riba e papel di but pero si warda te ora e kaso bai korte e suma di but ta subi mayoria bia. I ora e but subi por yega na areglo di pago. Pa areglo di pago por hasié na e bùs òf na Waaigat. Nan ta purba hasi nan servisionan mas fásil por ehèmpel tin e sistema di WhatsApp (+5999) 4342120 òf 4342123.
Pa loke ta number di telefòn general esaki ta 4342100 i lokèt pa víktima ta 4342108 òf 4342188.
Tanuysha a bisa ku komo ta algu nobo nan ta wak kon e reakshon ta. Dia 27 di yanüari nan lo ta riba kaya atrobe i 2 di febrüari. E dos dianan ei ta pa paga but i daño perhuisio i 15 di febrüari lokèt di víktima i mediashon. Lo publiká e lista riba retnan sosial.
Kòrda paga promé biaha
I no mester lubidá ku tin di paga but habrí promé bai di biahe. E idea di e bùs ta tambe ku nan lo para na e ‘parkerplaats’ di airopuerto. I ora tin e but habrí i e pasahero naturalmente lo no por subi buelo ya ku e tin di paga promé. Ta bon pa tene kuenta ku si atendé e but promé ku biaha, asta drenta areglo di pago, nada lo stroba e biahero di subi avion.
