SANTIAGO DE CHILE, AP.- E sekretario di Tesoro merikano Steven Mnuchin a sostené djárason ku su pais lo sigui apliká sanshon kontra esnan responsabel pa destruí demokrasia na Venezuela i desviá rekursonan lagando míles den pobresa.
Di bishita na Chile, Mnuchin a reuní ku presidente Sebastian Pinera i ku e minister di Finansa chileno Felipe Larrain. Den un enkuentro konhunto ku prensa Mnuchin i Pinera a kritiká e situashon venezolano.
“Nos strategia lo kontinuá ku mas sanshon kontra personanan ku ta manehando e pais, ku ta desviando pueblo den e situashon ku nan ta i e forma kon demokrasia a wòrdu destruí”, asina Mnuchin a bisa.
Pinera, a indiká ku e situashon di Venezuela “ta un krísis humanitario ku ta komprometiendo bida di e venezolanonan, 80% di e pueblo di Venezuela ta bibando bou di un liña di pobresa”.
E sekretarionan merikano a enfatisá ku “nos sanshonnan no ta dirigí na e pueblo, nos ta purbando di sigurá ku e yudansa humanitario por yega pa e venezolanonan”.
Anteriormente Mnuchin i Larrain a enfrentá preguntanan di prensa. Ambos a partisipá e siman aki den e reunion di ministernan di fiansa i presidentenan di Banko Sentral di G20 na Buenos Aires, Argentina, kaminda a analisá e situashon venezolano.
Na final di aprel nan lo reuní na Washington i lo sigui trata e tema di Venezuela den un reunion nobo di G20, un grupo di 19 nashon industrialisá i emergente inkluyendo Union Europeo.
