WILLEMSTAD.- Durante un enkuentro festivo ku tur spònser i partner, na Avila Hotel, a lansá e edishon mas nobo di Monopoly Kòrsou. E wega di mesa ta kontené atrobe lugánan turístiko, kompanianan íkono, playa i hotèl riba e isla. E wega lo ta disponibel pa benta eksklusivamente for di 10 di novèmber na tur dos lokalidat di Van den Tweel Supermarket na Kòrsou i ta prometé, manera e promé edishon ku a sali na 2014, di ta un éksito grandi.
Van den Tweel i Identity Games a traha duru durante e último aña pa produkshon di e edishon nobo aki. Kompanianan lokal i organisashonnan, pero tambe lugá turístiko lokal ta inkluí den e wega mediante un kaya, un tarheta di posibilidat, òf un tarheta di fondo general. Ademas di esaki, e tabla di wega mes a wòrdu transformá den un bunita imágen di Scuba Lodge & Ocean Suites ku ta kumpli 15 aña e aña aki. Minister di Asuntunan Ekonómiko di Kòrsou a haña e oportunidat pa deskubrí e wega i a papia bon di e inisiativa. “Esaki ta un manera úniko i speshal pa presentá Kòrsou komo destinashon di biahe pero tambe komo un isla yen di aktividat ekonómiko. Esaki por kontribuí sigur na nos ekonomia i yuda pa di un manera dibertido, siña mas di nos pais. Nos ta orguyoso ku Kòrsou tin su mes edishon di e wega mundialmente konosí Monopoly,” segun Cijntje.
Durante e evento, tur spònser a risibí komo regalo un print grandi di nan mesun kaya riba e wega i mesora a kuminsá kompartí teps i trukonan tokante kon hasi pa hunga Monopoly Kòrsou na su mihó manera pa gana. E wega lo ta disponibel pa e públiko for di 10 di novèmber 2023 na Van den Tweel Zeelandia i Jan Thiel, na online riba www.bol.com i tambe na algun kompania partisipante. E kantidat di wega ta limitá i ta bon pa no warda muchu pa kumprá e wega. Pa mas informashon tokante e wega i e lansamentu por bishitá e página di Facebook i Instagram di Monopoly Kòrsou.
