WILLEMSTAD.- Mayoria di parlamento hulandes, Tweede Kamer, e siman aki a aprobá un moshon relashoná ku alohamentu di refugiado na Kòrsou. E moshon ta bisa ku gobièrnu hulandes tin ku ofresé yudansa na Kòrsou, relashoná ku problemátiko di refugiadonan. E moshon a wòrdu entregá dor di parlamentario Sylvana Simons di partido Bij1.
Den un entrevista ku EXTRA e ta splika ku meta di e moshon ta ku Hulanda ta ofresé yudansa pa organisá un bon protekshon hurídiko pa refugiadonan. Pa yega na esaki organisashonnan ku ta sali na defensa di derechi di hende tambe tin un ròl importante, segun Simons.
Te ainda Kòrsou ta konosé basta problema ku refugiadonan. Den e moshon ta skirbi ku hende ku a drenta Kòrsou sin dokumento, inkluí muchanan, te ainda ta wòrdu será bou di sirkunstansia deplorabel òf ta wòrdu deportá bek na nan pais. Simons ta splika ku “komo konsekuensia di e situashon un parti di e refugiado ta biba sin dokumento na Kòrsou. Nan por bira víktima di abuso. Na Hulanda Oropeo situashon no ta bon tampoko. Nos tin nos mes problemanan ku alohamentu di refugiado. Pero Hulanda ta konosé diferente struktura I entidatnan pa yuda refugiadonan. Ku e struktura i konosementu di problema Hulanda por yuda.”
Segun Simons resientemente durante su bishita na Kòrsou den luna di ougùstùs el a palabrá ku diferente organisashonnan ku ta Sali na defensa di derecho di hende. Nan ta pidi Hulanda pa duna yudansa, segun Simons. “Pa nos ta hopi importante ku Hulanda ta pidi Kòrsou kon nan por yuda. Gobièrnu hulandes no mester bin ku nan mes plan I intenshon, pero skucha kon nan por yuda Kòrsou. Na promé instansia Hulanda tin ku bisa Kòrsou ku nan ta habri pa yuda. Ta Kòrsou mes ku tin ku aserka Hulanda pa esei, si realmente nan ke yudansa. Segun nos ku e moshon esaki e ta bira un tiki mas fásil pa Kòrsou por pidi esei. Pasobra for di awor nan ta na altura ku mayoria di Parlamento di Hulanda ta na fabor ku Hulanda ta duna yudansa.”
Simons ta splika ku den su moshon ta hopi importante: “Ku Hulanda ta habri pa yuda, pero Kòrsou ta disidí ki tipo di yudansa nan ke. Esaki ta intenshon di e moshon. Mi ta spera ku e moshon ta inspirá Kòrsou pa bin ku un plan pa mehorá e situashon ku refugiadonan.”
Segun Simons te ainda e problema ku refugiado ta grandi, pero e personanan indokumenta no hopi visibel. “Segun tur sifranan tin hopi refugiado na Kòrsou. Per bo no ta mira nan riba kaya. Nan ta hopi invisibel, ku ta algu hopi preokupante. Spesialmente den e kaso di muchanan i hende muhé. Nos ke protehá nan, i esaki ta e motibu ku nos a bin ku e moshon.”
