Despues di algun tempu tin un lokal komo PG atrobe
WILLEMSTAD.-Informashon a drenta for di Ministerio Publiko ku mr. Guillano Schoop a keda ofisialmente nombra komo Prokurador General. Konseho di Minister di Reino riba rekomendashon di minister Yesigoz-Zegerius di Hustisia i Seguridat i tambe na nòmber di ministernan di hustisia di Kòrsou i Sint Maarten a bai di akuerdo pa nombra mr. Guillano Schoop komo PG na Parket Procureur-Generaal di Ministerio Publiko. Schoop ta sigui mr. Maan. E nombramentu ta drenta na vigor 1 febrüari 2024.
E informe ta bisa ku sr. Schoop a resultá e kandidato mas fuerte den e trayekto di selekshon. Aktualmente e ta fiskal mayó suplente pa Kòrsou i banda di esei e ta dosente kaminda e por kombiná kontenido ku práktika. Di parti EXTRA tur klase di éksito i prinsipalmente forsa i sabiduria na Guillano Schoop.
