WILLEMSTAD. – Emblema mester ta “kasá” ku posishon di Kòrsou komo pais soberano den Reino, esaki ta opinion di Fundashon na Kaminda pa Libertat.
Fundashon Kòrsou na Kaminda pa Libertat ta felisitá pueblo di Kòrsou ku su emblema nobo kual lo bai remplasá e eskudo kolonial. E emblema lo ta un di e símbolo nashonal di pais Kòrsou, banda di e dos otro símbolonan ku ta nos Himno i nos Bandera.
E emblema, na opinion di Fundashon na Kaminda pa Libertat, mester ta “kasá” ku e posishon di pais Kòrsou komo pais soberano den Reino.
Nos emblema ta reflehá Kòrsou su soberania i derecho di gobernashon propio den Reino sin influensia i intervenshon di parti di gobièrnu hulandes.
Un kaluroso pabien na pueblo di Kòrsou ku a haña su emblema nobo indikando ku tumando pasonan firme dilanti pa yega na libertat.
