Amigunan di deporte, bon dia. Nos ta praktikamente den medio òktober i por mira ku a kuminsá krea e ambiente di fin di aña. Dia- i simannan ta pasa ku basta ‘speed’
Meday’i Oro
Situashon ta fututu aya na Paraguay, derota tras di derota den e diferente ramonan di deporte. Sigur un situashon lamentabel. Nos ta puntra si en bèrdat tabatin un preparashon di focus riba partisipashon di Kòrsou den ODESUR. Bo por prepará, anto pèrdè una bes ku derota tambe ta eksistí den deporte. Pero e pregunta ta, si nos a prepará.
Meday’i Oro
Laga nos ta hopi sinsero na pone ku pa nos a resultá un sorpresa grandi e diferente federashonnan ku a forma parti dje delegashon di Kòrsou. Nos no a tende ni mira señal for di nan seno ku tin biahe pendiente pa ODESUR. Pero ademas di no a mira ni tende nada di federashonnan, FDOK tambe tin ku karga ku e kulpa.
Meday’i Oro
FDOK mester duna kuenta i rason kon e preparashon dje diferente delegashonnan a tuma lugá, kuantu tempu pero mas ku esei, si tabatin plan di preparashon i ken ta esun òf esnan ku a tabatin e tarea pa supervisá e preparashonnan. Un biaha mas, bo por train hopi bon, ku tremendo plan i tòg sufri derota. Pero si bai tuma sla pasobra no tabatin un preparashon adekuá, esei si ta hinter un otro situashon.
Meday’i Oro
Tuma nota ku beisbòl di Kòrsou lo ta den Kopa di Karibe na Bahamas den promé mitar di luna di desèmber. Kòrsou lo hasi e biahe komo kampion pa defendé título, pero tambe lo buska klasifikashon pa Weganan CAC di otro aña na El Salvador. Ku e loke Kòrsou a presta e aña’ki na Hulanda, por bisa ku nos tin un bon ekipo riba pia.
Meday’i Oro
Pa desèmber awor lo no tin duda ku mas pelotero profeshonal lo por djòin e ekipo di Kòrsou pa buska e pase pa Weganan CAC. Esei sigur lo ta algu realmente grandi. No lubidá ku den pasado nos a gana oro i plata ku beisbòl den CAC. Esei ta basta aña pasá, pero awor nos tin tambe peloteronan mihó prepará.
Meday’i Oro
Eloy Room kandidato pa e premio komo mihó kiper e temporada aki na Merka. Pero nèt den wikènt ultimo nan a kai 2-1 i a keda for di postemporada di e kampionato norteamerikano. Esei si ta un di malu, sigur si e votashon ta inkluí weganan di postemporada. Pero di tur manera, meskos ku tabata e kaso den 2021 un biaha mas e kiper di selekshon di Kòrsou ta risibí rekonosimentu komo un dje tòp kipernan aktivo na Merka.
Meday’i Oro
Atlanta Braves a pèrdè ayera i te anochi lat San Diego Padres ku Jurickson Profar tambe tabata mira’tras den skor. E serinan ta ‘best of five’, pues nan respektivo ekipo tin amplio oportunidat pa bini bek. Kenley no a mira akshon ayera miéntras ku tur hende ta pendiente pa Ozzie Albies, e tei òf lo e no tei? Pero tur kos ta dependé tambe pa Braves sali na bida for di e aktual seri.
Meday’i Oro
Nos quote pa awe: “Hendenan ku sa masha poko, mayoria biaha ta e gran papiadónan miéntras ku esnan ku ta brota di sabiduria ta sigui skucha pa por hasi distinshon entre e papiadónan”.
