Sistema di GPS a pone ku polis a yega na e outo
WILLEMSTAD.- Korte di promé instansia no por a proba ku hòmber tabata den poseshon di vehíkulo hòrtá i ku e ta esun ku a hòrta e outo.
Ta trata di F.R. (32) ku ta keda akusá di a hòrta un vehíkulo na aprel último.
E akusado a atmití ku e tabata den e vehíkulo, pero e no tabata sa ku e ta hòrtá ni e no ta esun ku a hòrta e vehíkulo.
El a splika ku riba e dia enkuestion e tabata kanando ta bai kas, ora un hòmber ku e konosé pa kara a pasa i puntr’é ku e ke left. Debí ku e tabata hopi kansá, el a bai di akuerdo pa tuma e left. Segun e akusado, na kaminda pa bai kas e persona a bis’é pa e bah’é na kas i bai ku e outo pasó e ta fuma. Mainta e ta buska su drechi pa tuma e outo.
Segun e akusado, no a dura masha, ku polis a presentá na su kas i bis’é ku e tin un vehíkulo hòrtá poné riba su tereno. Polis a yega na e vehíkulo riba indikashon di e GPS.
Segun e agentenan, e akusado no por a splika detayadamente unda el a haña e outo. Esei a pone ku nan a bai na su detenshon.
E akusado a bisa ku e tin hopi duele ku el a tuma outo hòrtá pone den su kurá. Si e tabata sa, e lo no a tuma ni left te p’e keda ku e outo.
Fiskal den su rekisitorio a duna di konosé ku e no por proba ku e akusado a hòrta e vehíkulo. Pero si e ta kulp’é ku e tabata den poseshon di un outo hòrtá.
Fiskal ta yega na un demanda di 200 ora di trabou pa komunidat di kual 80 kondishonal.
Abogado den su defensa a bisa wes entre otro, ku no tin niun prueba ku su kliente a hòrta e vehíkulo. El a bisa ku su kliente no ta dje kèns ei pa hòrta un outo i poné den su kurá. P’esei el a pidi pa tene kuenta ku su kliente a koperá ku e investigashon i tambe ku e ta lamentá e loke el a hasi.
Wes den su demanda no a mira motibu pa desviá i a bai kompletamente di akuerdo ku e demanda.
