WILLEMSTAD.- Universidat di Kòrsou a kuminsá di inventarisá informashon for di mayornan tokante e posibel karga peso ku nan ta eksperensiá relashoná ku yudansa di nan yunan na skol. Asina dr. Odette van Brummen-Girigori ta bisa den un entrevista ku EXTRA. Van Brummen-Girigori ta kolaboradó di University of Curaçao Research Institute (UCRI) i presidente di Foundation Fair Educational Chance (FFEC).
E ta splika ku universidat a haña señal ku mayornan na Kòrsou ta sinti ku skol ta eksihí pa nan hinka hopi tempu den e yudansa di nan yu. ‘Pero hopi mayor ta indiká ku nan no tin e konosementu nesesario pa yuda nan yu na un forma adekuá. Esei ta un preokupashon hopi grandi.’
Van Brummen-Girigori ta splika ku un di e motibunan ta ku ‘kuríkulo pa yunan na skol di fundeshi i avansá a kambia i awor ta hopi mas pisá ku por ehèmpel 20 aña pasá. Awor nos ta ripará ku maestronan no ta logra finalisá tareanan durante di skol. Mayornan tin ku asistí despues di skol.’ Van Brummen-Girigori ta splika ku tin mayor ku por paga pa un guia profeshonal, tin mayor ku ta skohé pa un ruman mas grandi òf un famia yuda e yu. Dor ku e mayornan mes no sa kon nan por yuda òf pa motibu ku nan tin ku traha. Pero tambe tin yunan ku no ta haña yudansa, pa motibu ku mayornan no tin sèn pa paga pa esaki i tampoko nan tin famia ku por yuda.’
Van Brummen-Girigori ta splika ku a bira normal den nos komunidat ku mayornan ku ta paga pa yudansa profeshonal tin ku yuda nan yu tambe, un òf dos ora pa dia èkstra. Tin mayornan ku no por paga pa yudansa profeshonal i ku ta yuda nan yu entre tres i kuater ora pa dia.’ Segun Van Brummen-Girigori esaki ta nifiká ku e dia pa yunan ta bira hopi largu. Banda di esei e sistema ta krea divishon den nos komunidat. ‘Yunan no ta haña oportunidat igual. Pasobra esnan ku tin mayornan ku sèn por haña yudansa, yunan ku no tin mayornan ku sèn ta kai chikí.’
Pa haña un bista riba e problemátika akí a inisiá un investigashon kuantitativo ku ta un inisiativa di Universidat di Kòrsou Dr. Moises da Costa Gomez (UoC), Foundation Fair Educational Chance (FFEC) i Rijksuniversiteit Groningen (RUG) di Hulanda. Koordinashon ta den man di Odette van Brummen-Girigori.
E resultadonan lo forma base pa konseho konkreto basá riba evidensia na esnan ku ta formulá maneho. E kuestionario ta disponibel den forma digital, tantu na hulandes komo na papiamentu. Tur esnan interesá por haña e kuestionario via di e link:
www.uoc.cw/ouderbelasting.
