Obranan di arte di studiantenan di IBB den galeria di Djasabra

443

Den sala di grabashon di Djasabra na EXTRA nos a pone obranan di arte nobo di hóbennan studiante di Instituto Buena Bista. I tabata interesante pa por a papia ku e representante di IBB Omar Martha i kada un di e hóbennan pa nan splika kiko nan obra ta para pe. Un total di 7 obra di arte próksimamente lo ta kologá den fondo di nos galeria di arte durante di grabashonnan di Djasabra.

Historia di IBB

IBB ta un skol di arte, un skol preparatorio pa hóbennan ku talento na Kòrsou ku tin gana di sigui studia algu kreativo òf artístiko despues. Den 2 aña ta purba pa nan siña lo máksimo posibel pa loke ta arte i kreatividat pa nan por bai un akademia di arte despues. No nesesariamente e hóben mester tin un preparashon pa drenta e skol di arte aki pero primariamente nan mester di un talento i nan mester ta hasiendo algu ku e talento ei. No ta asina ku IBB ta un skol di pintamentu pero un hende ku si por pinta òf fotografia, skibi, i tin un talento ku e ta bezig kuné, i tin gana di sigui hasi algu kuné despues i voral bai sigui studia i profeshonalisá su mes den dje por bai IBB pa prepará su mes.

 

Sosten na Studiantenan te na Ulanda

IBB su studiantenan no ta bini na remarke pa finansiamentu di estudio pero nan mes mester page. IBB ta kosta 3500 florin pa aña. Por parti e pago den vários luna i si e hóben no por paga e sèn kompleto, por yega na un areglo ku por ehèmpel spònser.  Ainda IBB no ta rekonosé na Kòrsou komo un instituto edukashonal pa por kai den e finansiamentu di estudio. Loke si ta remarkabel ta ku na Ulanda si IBB ta rekonosé komo un instituto di edukashon. Mayoria di akademia di arte na Ulanda, IBB tin relashon kuné, kaminda ora un studiante presentá einan komo studiante di IBB e ta nifiká algu pa e akademia. Ya e akademia sa ki tipo di studiante nan lo haña ora esaki bin di IBB. I p’esei den 16 aña di eksistensia di IBB segun Omar nan no tabatin studiante kasi mes den e mas di 200 ku a sigui nan estudio ku no a keda permití den e akademianan na Ulanda. E studiantenan di IBB ta logra masha bon resultado na Ulanda. IBB aki na Kòrsou segun Omar ta produsí hóbennan ku porsentahe masha haltu na Ulanda i no ta kambia di estudio. IBB tin masha bon rèkert di studiantenan ku asina nan ta kla pa bai studia ta realmente nan ta kla i sa kiko nan ke. E studiantenan ta stimulá pa kaba i si nan trompeká IBB semper tei pa yuda nan i duna nan e sosten pa nan kaba. Konsekuentemente segun e splikashon di Omar, nan ta sigui tras di e studiante asta ora e ta na un akademia di arte na Ulanda. Nan no ta stòp di sostené e studiante i ta keda huntu ku nan. Na Kòrsou e guia ta kuminsá i ta sigui te na Ulanda.  Si algu no ta bai bon, e skol mes ta tuma kontakto ku nan na IBB i asina nan di IBB por bula den i yuda e studiante. Segun Omar esaki ta algu ku nan ta para tras di dje pa sostené e studiantenan i ku no ta kaba ku nan sertifikado na Kòrsou pero ta sigui te ora nan kaba ku nan estudio den eksterior.

 

Arte no komo hòbi

E idea ta pa e interes di e hóben mester tei pa bai e parti profeshonal i no puramente ku ta algu ku e persona ta hasi komo hòbi banda di su profeshon ku por ehèmpel ta akountent pero mester ta personanan ku tin e interes pa sigui studia i profeshonalisá nan mes. Na IBB ta siña tur e partinan di kreatividat i e partinan mas serio ku por ehèmpel papia di nan trabou, skibi di nan trabou, pensa dikon ta hasiendo algu i kon ta bai hasié. Tur e partinan profeshonal ku ta bin aserka pa ora ta ehersé e trabou kreativo or artístiko di moda ku e studiante ba akademia di arte e ta bon prepará.

 

Studia na Ulanda òf den region

Despues di pasa IBB e studiante ta sigui otro pais. Omar a splika ku idea ta pa e hóben bai sigui studia despues i lástimamente no ta algu ku por keda hasi na Kòrsou. Tur e hóbennan ta bai studia den eksterior. Mayoria ta bai Ulanda i esei tin di aber ku e finansiamentu di estudio pasobra hopi no por ‘afford’ pa bai studia den region òf na Merka.  En prinsipio e idea ta ku si tin hóbennan ku ke i por bai studia den region esei tambe ta posibel. Nan tabatin studiante ku a yega di bai studia na Martinique i esei dor ku e pais ei ta konta komo Fransia i e skol tin mesun nivel i mesun preis ku ta paga den Oropa pa studia. Einan tin un akademia di arte ku algun studiante di IBB a forma parti di dje.

Kreatividat

Relashoná ku e persepshon ku arte no ta un opshon pa estudio, Omar a bisa Djasabra ku loke semper nan ta indiká na personanan ku ta pensa asina ta e personanan ku hopi bia ta kore outo di diseño, ta bisti paña di diseño, kèts di marka, brel nechi i di marka pero ta un hende kreativo a hasi tur e diseñonan ei. “Nos ta hasi manera e sektor kreativo no ta eksistí miéntras tur kos a hasi den nos bida tin un persona kreativo a mishi kuné. E idea ku e kreatividat bo no por traha sèn i voral e parti ku tin difikultat p traha sèn kuné no ta un idea ku nos ta kompartí i voral e idea ku si bria akountent i abogado tin seguridat di trabou. E dos delaster  aña  a demostrá ku esei ta un idea robes. Awor aki e no ta konta mas i ta hustamente e esfuerso personal di kada persona ta determiná si e ta logr’e òf no. No por sinta na kas i e trabou tei tòg i no mester hasi esfuerso. E artista tambe mester hasi esfuerso meskos ku tur otro rango”, Omar a bisa.

 

Eks studiantenan destakando

Instituto Buena Bista tin hopi bon nòmber na Ulanda. Tantu David Bade komo Tirso Martha inisiadónan di IBB ta artistanan grandi na Ulanda. I banda di nan tambe tin diferente otro artista mas ku tabata èks studiantenan di IBB ku ta trahando nan nòmber na Ulanda. Tin manera Eugenie Boon den e  Biennale di Venecia ku ta andando. Ta e shou di mas grandi di arte mundial kaminda tur pais ta manda artistanan ku nan ta konsiderá e tòp na e momentu ei. Rinella Alfonso ku a gana premio máksimo di Schilderkunst. I tin kantidat di eks studiante ku ta destakando i ta trahando nan mes nòmber den eksterior. Esei ta algu ku IBB ta aploudí i pusha e studiantenan pa nan keda bai dilanti. E ta nifiká bon nòmber pa nan mes, pa IBB i pa Kòrsou.

 

Studiantenan di IBB

 

Germain Cathalina ta studiante arte na Instituto Buena Bista tambe i próksimamente lo bai sigui su estudio na Ulanda. E tin un kuadro basta grandi di mas di 1.5 pa 1.5 meter grandi. Ora wak e obra, e ta manera un hende sintá riba un pòchi wc. E ta un ekspreshon di su sentimentunan na momentu ku el a pint’é kaminda e tabata pensa riba su problemanan. Germain a splika esaki tabata un parti di un seri di pintura Burning Calmly ku e no sa papia masha di dje. Esaki ta e di dos pintura di e seri.

No mester di wak henter e seri pa por komprondé pasobra kada un ta riba nan mes. E obra ta bai tokante ku bo tin di laga los di loke bo tin den kabes. Esaki solamente ta kousa doló i físikamente mester laga lòs. Si tin un doló un kaminda laga lòs, den kabes laga lòs i no keda pensa i no tene kos paden. Germain ta un artista ku ta skèch. E ta preferá pinta den buki skèch ku pòtlot i gráfiko.. E obra aki ta esun promé ku el a hasi ku fèrf di zeta. E ta hañ’é un eksperensia bunita. Germain a bisa ku  e lo bin bèk Kòrsou, despues di su estudio na Ulanda.

 

Catalina Vergeylen e hóben aki tin un aña na IBB i su obra ta otro ekspreshon di un hende kara tapá. Dia el a trah’é e tabata poko kontentu na e momentu ei. E kier a traha un obra di dje, asina el a splika nos di Djasabra. Pa ekspresá su emoshon i kon e tin di dil kuné e mester  a pinta su emoshon i esei el a hasi.

Esaki ta komienso di depreshon kaminda bo ta sinti ku tin algu pero bo ta trata duru pa kubrié i p’esei parti di e pintura ta pretu. Catalina su mama tambe ta den arte i komo mucha e tabata interesá kiko su mama ta hasi i a purba kopia su mama. Asina e tambe a kuminsá den arte i kuminsá na un edat hopi yòn. Catalina lo ke sigui su estudio di arte na Canada i su di dos opshon ta Bèlgika ku ta mas fásil pe. E ta spera di mira su mes felis  pintando i hasiendo loke e gusta hasi i asina gana su pan kuné.

 

Gerson Martina  su obra ta di un hende ku poder. E obra a haña nòmber miéntras e tabata traha ku e tema su tras ta ‘Greatness’ i komo dal el a dun’é e nòmber ei tambe. Loke a inspirá Gerson pa hasi e obra ta básikamente e situashon emoshonal di kiko ta ‘greatness’. E ta mira su mes komo un persona ku ta hasi kos diferente di otro i ku ke marka su nòmber den historia, I promé ku e muri e ke tin un legado grandi. E gusta bòkseo i a mustra riba personanan manera Mohamed Alli, den futbòl Ronaldo i hopi mas i tur tin komun ku nan ta básikamente bibando un legado i esei Gerson ke yega na dje.

Dia el a kuminsá pinta tabata mas òf ménos 7 aña pasá, pero no tabata nada serio. Na skol e tabata gusta pinta den su bukinan di skol i nunka a realisá ta kiko e ta hasiendo. Ora el a kaba skol sekundario el a bai IBB i tabata un eksperensia diferente ku tur kos. El a sintié mas kontentu hasiendo arte ku nada otro. El a disidí di hinka mas den dje i realmente e ke ta loke e ta hasiendo aki. Gerson ke amplia su horizonte i no ke ta establesé un kaminda so. I esaki e e hasi pasobra e por logra haña su nòmber den buki di historia.

 

Kirsten Redeker  ta presentá su obra ku tambe por mira den nos galeria di arte den próksimo grabashonnan di Djasabra. Esaki ta un obra ku el a krea algun luna pasá ora el a kuminsá pinta ku zeta pa promé bia. P’e esaki ta un trabou importante pasobra el a kambia e forma kon e ta pinta. Promé e tabata pinta akriliko. Su forma ku e ta mira arte a kambia despues di a obra aki. Su pashon pa pintamentu a kuminsá ora e tabata den klas 2 di skol sekundario. I dos pa tras aña pasa el a kuminsá realmente pinta i a bira opseshoná kuné.

Kirsten ta spera ku e por gana un bida ku arte. Kirsten a bisa ku su mayornan semper a sostené. Un di e rekisitonan ku tabatin ora e tabata den skol sekundario kaminda e mester a skohe den ki direkshon e ta bai ta, ku e lo skohe pa arte. Su mayornan a sostené ora el a skohe. Kirsten ta mira su mes hasiendo arte aki 10 aña. E ta spera ku e lo ta eksitoso i un di su metanan ta pa por ta den eksposishonnan i kisas asta un museo lo ta algu grandi pe.

 

George Sling Hans ta un di e hóbennan ku un obra gigantesko den nos galeria. I George ta un di e studiantenan di IBB ku e aña aki lo bai sigui su estudio na Ulanda. E obra ta basta grandi. El a bisa ku el a kuminsá ku e obra pero no tabata sa kon pa kab’é. Den un workshop di komposishon ku tepnan di Tirso Martha el a haña e direkshon kon pa kaba e obra. Por mira un man riba e pintura i por mira huntu ku e man e bluri di esun patras. Si konsentrá riba dje, por mira e man ta swich. E idea tras di e pintura ta leu pero tòg serka. Tabata un sentimentu ku e tabata sinti di un relashon leu i e mester a lag’é bai. Mihó bo keda serka di bo mes pasobra e ta bira difísil pa bo i ku esei George a bisa ku si bo ke krea algu ta mas fásil bo keda serka di bo mes.

E ta konsentrá hopi den detayenan ora e ta trahando un obra. E ta purba lòs su mes manera e obra ku el a presentá. E no a kuminsá e pintura ku e fondo blanku manera normalmente sa ta e kaso. Ku fondo blanku bo ta keda pensa kiko pa hasi, i p’esei kuminsando na e fondo shushá, no a strob’é pa hasi loke e kier  a logra. Riba e obra por mira un man i un dama pintá. George a bisa ku el a kuminsá pinta riba su mes pero finalmente a usa modelo pa e por a haña e forma di kurpa. George  su promé añanan na IBB tabata un pia aden i un pia afó pasobra e tabata komo partaimer. E kier a partisipá den tur e tayernan pero kada bes ora e yega ya nan ta bezig. El a kambia i bai tempu kompleto pa e siña muchu mas. E ta mira su estudio na Ulanda ku hopi espektativa.

 

Ruthvienca Pietersz a konta Djasabra ku e obra aki ta basá riba emoshon. Emoshon no presis negativo pasobra e tin e positivismo tras di dje.  “Hopi bia nos tin emoshonnan un tiki agresivo kaminda nos ta pensa pa hasi algu pero pa ekspres’é den arte ta muchu mas mihó ku sali eifó i hasi algu robes i despues bo ta sinta un kaminda ku bo no tin bo libertat mas”. Esaki ta e obra ku tin un historia personal tras di dje ku tabata e kousa ku el a pint’é. Huntu ku e tepnan di Tirzo pa laga lòs i no keda muchu riba perfekshon pero sali out òf the box i mustra agresividat, e rabia ei den e obra pa e ta perfekto. Esei ta loke nan ta siña hopi di Tirzo i e otro dosentenan ku nan tabatin i tin te ainda.

Nan tur ta bisa nan pa sali for di nan zona konfortabel i esei Ruvi a hasi den e obra aki. E ta  pinta pero tambe ta gusta muzik. Tempu el a kuminsá na IBB e no tabatin interes den fèrfmentu pero tiki tiki ora e ta kana opservá otro pinturanan, el a haña mas tep i lès kon pa traha. Ku e konosementu ku el a atkerí di e fèrfmentu esaki a bira mas interesante pe a hasi. Ruvi tambe ta bai sigui su estudio e aña aki na Ulanda. E tin den su mente pa bai Enschede pa studia. E ke sigui ku Fine arts pa e proseso di dje por kontinuá. Fine arts segun Ruvi básikamente ta e parti ku e ta konsiderá mas liber pa ekspresá den arte. Ruvi a yega di partisipá den Street painting ku Dutch Caribbean i a pinta ku kreit riba kaya. Ruvi su intenshon ta bai bin bèk ora e kaba di studia. Na Kòrsou tin hopi hóben ku no ta na altura kiko tur arte ta kome i bebe i nan ta pensa ku ta pintamentu òf un sierto manera di pinta so ta arte. I p’esei e ke bin bèk pa siña mas kiko ta arte realmente. Hopi bia ta konsentrá riba e parti negativo di e hóben i no ta buska manera pa yuda nan pa e parti positivo, pa nan ekspreshon propio por sali.

 

Iris Zavala Blanco tambe tin su obra den e galeria di arte di EXTRA. Iris a splika ku e tabata papia ku Tirso pasobra e tabata ke pa Iris bai na un pintura hopi mas grandi. Tirso sa duna tema pero den kaso di Iris el a dun’é su libertat pa e hasi loke e ke ku e pintura pero mester ta algu apart ku nunka Iris a hasi. El a pensa den libertat. No tabata fásil pasobra Iris a haña e kuadro kòrta, ku por sierto tabata un regalo di un otro artista Johana Franco Sapata promé ku el a bai biba Ulanda. Tabata un kuadro koló blou. “Mi gusta ta liber i mi a pita un persona ku ta liber pero tòg tin wowo, orea ta tende, formanan apstrakto. Ora mi para wak e pintura mi ta sinti un libertat di dje”, Iris a konta nos. Ku libertat Iris a bisa ku sinti liber ta nifiká no wòri ku niun stereotipo, no importá kiko tin den kabes pasobra ora ta pinta no mester wòri kiko otro hende ta pensa ni komplasé otro.

Mester ekspresá bo mes den bo pintura i esei Iris ta sinti ora e ta papia di libertat. Iris ta haña ku e mes ta inspirá su mes den su trabou. Kada bia ku e pinta e ta purba hasié mihó. E tin hopi espektativa pa den futuro. E tin plannan grandi i si e keda na un nivel e no ta krese i lo no logra e kosnan ku e ke logra. Iris tin dos aña i mei na IBB pero for di chikí e tabata gusta pinta. E ta kòrda kon e tabata pinta asta den su mama su beibel. El a stòp un tempu i ta ora el a pinta algu pone riba su status i tur hende a gust’é, el a haña e empuhe pa bai skol di arte i a yega na IBB. E ta mira un kambio inmenso den dos aña i mei ku e ta na IBB. El a bisa  ku na IBB no ta laga e studiante keda un kaminda pero e ta keda haña konseho i téknikanan konstantemente. E ta siña diferente kos i no pintura so. Na IBB bo no ta kansa. Iris lo ke bai sigui su estudio den eksterior i ke hasi karera ounke e k bin Kòrsou bèk. E ke lanta un fundashon pa yuda mucha pasobra hopi hende ta balotá arte i no ta wak kuantu arte por yuda mucha.

 

 

LAGA UN KOMENTARIO

Please enter your comment!
Please enter your name here