WILLEMSTAD.- ‘E echo ku Direktiva di Skolnan Katóliko (RKCS) a tuma desishon pa mas skol lo tin lenga di instrukshon na hulandes por ta un señal ku tin hopi mayor ku ta skohe pa un skol na hulandes. E ta algu ku gobièrnu tin ku atendé, pasobra nos ta mira pa basta tempu ku tin hopi interes pa skolnan na hulandes. Pero si nos ke ku nos skolnan na Papiamentu ta bira mas eksitoso, nos tin ku sòru ku e parti na Papiamentu den nos skolnan ta bon. Ku tur su kondishonnan ta na òrdu, maestronan regularmente ta haña nan instrukshon i material ta keda renobá.’
Asina sr. Ronald Severing a bisa den un entrevista ku EXTRA. Severing ta profesor di Idioma (‘Taal verwerven, taalleren en taalonderwijzen in het bijzonder van het Papiamentu’) na Universidat di Kòrsou (UoC). Severing ta reakshoná riba desishon ku RKCS resientemente a duna di konosé ku pa aña eskolar 2023-2024 lo tin un oferta mas amplio relashoná ku lenga di instrukshon pa skolnan di funderend onderwijs. Te ainda di tur skol di RKCS solamente Vigdis Jonckheer Mensing College tin hulandes komo lenga di instrukshon.
For di 1 di ougùstùs 2023 kuater skol èkstra ta kuminsá ku hulandes komo lenga di instrukshon den grupo 1. Ku ta e skolnan: Sint Margaretha College (Janwe) i Sint Franciscus College (Janwe), Santa Famia (Otrobanda) I Maria Auxiliadora College.
Tambe Sint Antonius College, banda di nan enseñansa regular, ta kuminsá ku lès na ingles pa un klas di grupo-1. Severing ta splika ku tin material na Papiamentu pa skolnan ku pa mas ku 20 aña no a wòrdu di renobá. ‘Mientrastantu na otro pais material di lès ta wòrdu renobá kada sinku aña. Mi sa ku nos no tin e sèn. Pero ta kosnan ku nos mester haña atenshon si.’
Severing ta splika ku e no ta teme ku e desishon di RKCS lo tin konsekuensia negativo pa e idioma di Papiamentu, manera sierto polítiko i sindikalista a bisa resientemente. ‘E lei di enseñansa di fundeshi ta asina fuerte ku tur mucha na final di enseñansa di fundeshi sa ku nan mester kumpli ku metanan ku ta pone den lei, ámbos na Hulandes i na Papiamentu.’
Pero segun Severing na mesun momento nos tin ku atmití ku te ainda ta falta invershon den e material di lès na Papiamentu. E ta spera ku e diskushon ku a lanta resientemente tokante lenga di instrukshon lo tin komo konsekuensia ku lo tin mas atenshon pa esaki.
