Gerard ta atvertí minister
WILLEMSTAD.- Parlamentario pa partido Nashonal, Elvin Gerard ta atvertí minister di salubridat, Medio Ambiente i Naturalesa, Javier Silvania pa e paga bon tinu ora e ta haña reklamo di trahadónan. E parlamentario ta referí aki na e situashon ku a surgi na Technische Higiënische Zorg (THZ).
Gerard ta konsehá e minister pa paga tinu ku esnan ku tin komo kustumber pa reklamá i perhudiká koleganan. “Nos tin informashon ku esaki ta un “modus operandi” di e persona(nan) aki”, Gerard ta bisa.
E parlamentario ta na altura di sigur 3 kaso den pasado kaminda a reklamá koleganan ku e meta dirigí pa perhudiká nan. “Den tur tres kaso tata di famia a sali perhudiká i mester a bai buska otro trabou.”
Un di e kasonan spesífiko ku Gerard ta referí na dje ta un hefe na ántes servisio ambiental. Despues di reklamo di un trahadó el a pèrdè su trabou. “Nos ta na altura di e práktikanan aki kaminda otronan ta bira víktima di dje.”
E aktitut desplegá durante di e protesta di trahadónan di THZ ku a bai te na despacho di minister tambe ta bisa hopi, Gerard ta remarká. Trahadónan despues di a komprondé ku konseho final di departamento di Human Resources & Organisatie (HRO) ta indiká ku no tin base pa sigui duna hefe di THZ prohibishon di entrada i ku e mester regresá su trabou, a bai reklamá minister Silvania a base di un kantidat di akusashon personal kontra e hefe.
Relashoná ku e tipo di akusashonnan aki, esta ku e hefe tin un relashon ku un trahadó ku ta kai bou di dje tambe i ku el a ekspresá su mes di forma negativo tokante e trahadónan, HRO ta yega na e konklushon ku por duna un atvertensia pa esaki, pero ku no ta algu pa a tuma un medida desproporshonal di dun’é prohibishon pa drenta ofisina. Un relashon amoroso ta algu primeramente di bida privá di e hefe di THZ.
Por spera di un bon doño di trabou ku e ta anda ku koutela ku interes di su trahadónan. E prohibishon di entrada ku minister Silvania a duna e hefe di THZ a dura sinembargo asina largu ku esaki tabata un kastigu desproporshonal kontra su persona. E tipo di medida aki por dura 6 siman te máksimo 3 luna, pero e minister a duna e hefe un prohibishon entrada for di 14 aprel 2023, pues 12 luna pasá ku e intenshon pa e keda pendiente un investigashon ku mester a tuma lugá ku e koutela i liheresa nesesario.
No por keda persistí den prolongá un medida di karakter temporal manera prohibishon di entrada bou di e preteksto ku esaki ta na interes di e investigashon. Gobièrnu mester a skucha e ámtenar riba e puntonan ku ta akus’é di dje, pero a dura te 16 febrüari 2024 promé ku esaki a tuma lugá.
Esaki ta 10 luna despues ku a dun’é su promé órden di prohibishon pa drenta ofisinanan di gobièrnu. Si e minister lo a persistí den keda prolongá e prohibishon di entrada i e ámtenar bai korte ku gobièrnu e chèns ta grandi ku e ta gana e kaso aki, HRO ta indiká.
