Farièle van Wilgen; Our Angels Journey
Farièle van Wilgen i Dominic van Wilgen ku hopi amor a inisiá e proyekto aki, despues ku nan a eksperensiá e pèrdida di nan yu Imani. Durante último 3 aña, nan a kuminsá un kaminda legal pa rekonosé tur baby ku ta nase sin bida. Den ámbos kaso legal, e mayornan Van Wilgen a logra demostrá e derecho di mayornan, tantu Mama, komo Tata, pa duna nan yu un nòmber di forma ofisial. Fundashon Our Angels Journey a lanta netamente pa informá i konsientisá riba e impakto di embaraso i pèrdida di yu.
Fundashon Our Angels Journey
Farièle den kombersashon ku nos di Djasabra a konta di Our Angels Journey. E fundashon a lanta despues ku Imani a fayesé na 2015. Na Kòrsou ta un tabú ainda pa papia di pèrdida di yu i embaraso i teniendo na kuenta ku nan ke organisá diferente aktividat, sin kisas un fundashon nan no por hasié. I asina pareha van Wilgen a lanta e fundashon Our Angels Journey.
E yu ku nase morto
Promé ku a yega na e fundashon, i promé ku Imani a fayesé, ora un yu nase morto òf un pèrdida di embaraso, e yu ei no ta konta den komunidat. Ta yam’é un yu ku a nase sin bida i no ta pone atenshon na dje, segun Farièle a konta nos. Si bai kranshi ku bo ID, kaminda normalmente lo por mira kuantu yu bo tin, e yu ku a nase morto no ta aparesé. Mester bai den archivo i einan ta bisa ki dia e yu a nase i fam di e mama, einan ta saka e dokumento di e yu.
Duna chèns pa dera e yu
Farièle e a splika ku ora Imani a nase, hopi kos a bai robes na hospital. Ora nan kier a der’é, esei no tabata posibel. Ta benta e yu afó. Imani tabatin 22 siman i 4 dia. Na Kranshi nan a haña skibí “Levensloos geboren kind”. Farièle tabata ke pa pone nòmber di e yu riba e dokumento na Kranshi pero nan a splik’é ku esei no ta posibel. Na Kòrsou no tin lei pa dun’é nòmber. E yu ku nase morto ta keda bentá afó. Segun Farièle, hospital ta duna e mayornan e posibilidat di dera e yu pero no ta duna sufisiente pa hasié. E mayornan no ta haña ni chèns di realisá e realidat tristu ku nan a pèrdè nan yu, no tin un sosten, no tin nada nada ku ta duna e mayornan un tempu pa pensa un poko. Ta den un tempu hopi kòrtiku tin di dera e yu i kla. Hopi hende segun Farièle no ta para ketu na e doló ku e mayornan ta keda kuné. Tur hende ta wak e parti di ku bo ta sali na estado, haña bo yu i bo ta felis. Pero no den tur kaso e ta meskos.
Lei Imani
Siguiendo un programa na Hulanda, na 2009 un señora Natasha a haña un yu ku a nase sin bida. Despues el a haña 2 yu mas i ora el a bai pa traha pasaporte pa e yunan, a bin resultá na registro einan, ku e yu no tin nòmber. E señora na Hulanda a kuminsá kana su kaminda i rei Willem Alexander a firma e dokumento pa e yu por tin nòmber. Farièle a bai Kranshi mesora i a pidi sita pa por duna su yu nòmber pasobra e lei ta eksistí na Hulanda. Pero el a komprondé ku e leinan di Hulanda i Kòrsou no ta kana meskos. E no a sinta ketu pero a buska e kaminda na Kòrsou i asina Farièle a aserká promé minister Rhuggenaath e tempu ei pa por kuminsá kana e kaminda pa por kambia lei, pa yunan ku a nase morto por haña nòmber. Asina via sra. Ana Maria Pauletta a kuminsá kana, firma petishonnan pa por a bai korte. Esei nan a logra 4 aña pasá. Farièle a konta ku nan a aserká hopi mas mayor pero al final ta algun so a bai korte pa asina evitá ku si nan no gana, mayornan kisas ku a hinka speransa den e kaso por keda desapuntá. Asina nan a kuminsá kana e kaso i pa bin ku e lei di Imani ku a pone ku tur mayor ku a pèrdè embaraso i yu morto por duna nan yu nòmber.
Kambia lei kompleto
E aña aki atrobe Farièle i su kasá Dominic a bai korte pasobra nan no tabata kasá tempu di Imani i e tabata karga Trinidad. Tur kaminda tabatin ku e tata no por a rekonosé su yu. Nan a bai korte atrobe i a gana ku Imani por karga van Wilgen. Riba e pregunta si Farièle ta sinti ku nan a logra nan meta for di tempu ku nan a kuminsá te awor, el a kontestá ku nunka nan ta para ketu kiko nan ta hasi pasobra nan ta hasié ku hopi amor. Nan ke pa nan yu i otronan tambe logra. Nan no a para ketu na portanan ku nan a habri pasobra loke nan ke ta pa kambia lei kompleto. Nan ke pa asina e yu nase na CMC kambia e lei ku por duna e yu nòmber mesora.
Un piedra komo símbolo
Den e 4 aña di eksistensia di e fundashon, nan ta hasi hopi kos tiki tiki. Farièle a bisa di ke hasi hopi mas, pero no tin fondo. E ta hasié for di propio fondo, pero e ke pa pueblo para ketu na henter luna di òktober. Aña pasá el a kuminsá ku e lusnan ros ku blou riba edifisionan. For di yanüari e ta kuminsá buska kontaktonan pa pone e lusnan ros i blou, pa asina trese e konsientisashon den pueblo di pèrdida di yu i embaraso. Aña pasá tambe nan a pone un piedra na santana di Morada Santa Bottelier i asina habri e oportunidat pa pone piedra si bo no sa unda bo yu ta. Hopi hende no sa unda nan yu ta. Esei a hera di pasa ku nan i p’esei awor tin un lugá pa hende por kòrda nan yu. Den nan kaso a hera di benta nan yu afó pero Farièle a bin bei hopi lihé i mesora a aktua pa evitá esei.
10 pa 12 yu ta nase morto/pèrdida di embaraso
Pa loke ta e kantidat di hendenan ku ta pèrdè yu i embaraso pa luna, e ta entre 10 pa 12 pa aña, segun Farièle i esaki ta muchu hopi. Den òktober e fundashon a organisá un seminario. Den e seminario Sikólogo sra. Anthony a hiba palabra ku un charla splikando ku aunke ku lástimamente pèrdida di embaraso i haña un yu ku ta nasé sin bida ta algu komun rònt mundu, e salú mental di e mayornan ku ta pasa den esaki no ta haña sufisiente atenshon. Mamanan ta sufri mas tantu di ansiedat i depreshon miéntras tantu ku e tatanan ta agitá, iritá i por pèrdè nan mes pa via ku nan ta sinti un pèrdida di kontròl. Tambe sra. Anthony a papia di e efektonan pa e resto di e famia, prinsipalmente e otro yunan.
Di dos orador tabata sra. De la Hoz-Andrea (MBA) ku a para ketu bisando ku ademas di dil ku un doló profundo di pèrdida, tambe mayornan tin ku enfrentá un karga finansiero grandi, ku tur e konsekuensia ku esaki ta trese kuné. Na su turno e konsekuensia aki den su totalidat ta hasi un impakto riba e parti sosioekonómiko di henter e komunidat. Tambe sra. De la Hoz-Andrea a para ketu riba kiko e komunidat, instansianan di salubridat i gobièrnu por hasi pa atendé ku e tópiko aki i hasi pèrdida di embaraso i di baby un karga nashonal. Den seminario ku nan a organisá a bin dilanti un persona ku a karga barika ku asta 42 siman, kaminda el a konta ku a bis’é ku e yu ta oké i tòg e yu ta nase morto. Fundashon “Our Angels Journey” ta wak bèk ku sumo plaser riba e seminario eksitoso. Sala tabata yen segun Farièle i esaki ta un indikashon ku mester di dje. Pueblo ke pa para ketu na e pèrdida di yu.
Impakto grandi
Pèrdida di yu tin un impakto hopi grandi, mas grandi ku nos por imaginá. Bo por tin un kolega trahando i ta manera ku e no tin smak i no ta funshoná korektamente, sin sa ku e ta kanando ku un doló di e pèrdè yu. Niun hende sa pasobra e ta un Tabú. Si bo sa esei bo tin di dun’é atenshon i dese’é forsa. Kisas no tur hende ke sali dilanti, pero ta importante pa duna atenshon na nan. Tin hende ta kana añanan, asta 40 aña i mas ku e doló aki i nan meresé atenshon. Farièle su ruman mes a fayesé despues di 2 dia ku el a nase i aña pasá (mas di 50 aña despues) Farièle por a dun’é nòmber (e mama mes a fayesé sin por a duna su yu nòmber).
Sosten na famia kompleto
No solamente e mama, pero e mayornan i famia kompleto mester di sosten. E tata ta kuminsá wak e plan finansiero ora e kasá ta na estado. Ta kuminsá prepará pa futuro di e yu i pa despues e no tei mas. Ta tur e preparashon ta krèsh. Mester duna e hende tempu. Farièle a konta ku den su kaso despues di pèrdida di Imani el a haña un yu mas. E loke el a pasa aden tabata un poko difísil pasobra den su kaso e tabatin dos yu kaba pero su kasa no tabatin yu ainda. I esaki a pone ku apesar di su edat haltu el a bai pa un yu mas. I ku bendishon di dios tur kos a bai bon.
Kla pa e bataya
Kiko mas awor? Our Angels Journey ta kla pa kuminsá e bataya pa kambio di e dokumento den CMC, nan ta kla pa e reto pa kambio di lei, tambe nan ke organisá eventonan pa mayornan bin huntu. I no solamente den òktober pero mas den aña. Tambe nan lo ke pa kompanianan yuda nan i no solamente ku lus di koló den luna di òktober, pero pone atenshon na algu ku ta duna mas sosten. E por ta un tabú pero pone atenshon na dje.
Dikon nos
“Dikon Nos”, ta e kontesta di Farièle riba e pregunta di kon e ku su kasá ta sinti nan ku ta nan ta esnan ku a kana ku e kaminda pa yega asina leu pa yunan ku nase morto òf pèrdida di embaraso e yu por haña nòmber. E ke sa dikon ta nan mester a kana kuné. E ta difísil pasobra Farièle su proseso di luto no a kuminsá. El a bisa ku e no ta kla ainda. E ke pa lei pasa pa asina niun hende lo haña nan ku e doló aki. E hende tin sufisiente doló kaba di pèrdè un yu. Mester konsientisá pa e servisio korekto i yuda nos hendenan ku a pasa den e doló. E doló ei mester pasa, pa e hende ku a pèrdè su yu, su proseso di luto por kuminsá realmente.
