WILLEMSTAD. – Despues di hopi reklamo ku a dura algun aña riba e kalidat di kombustibel ku Kòrsou tabata ofresé, por bisa ku awor aki Kòrsou tin kombustibel 100% segun spesifikashon nobo.
Despues ku Gobièrnu a bai di akuerdo ku e spesifikashon nobo pa kombustibel, na desèmber último, Curoil a kuminsá importá Mogas i Ultra Low Sulfur Diesel segun spesifikashonnan nobo stipulá pa Gobièrnu di Kòrsou.
Na e momento ei, a start e asina yama periodo di “Flush Out”. Durante e periodo aki, den tankinan di Curoil, CRU i pòmpnan di gasolin, ainda tabata tin kombustibel di e spesifikashon anterior ku a meskla ku e kombustibel di e spesifikashon nobo. Entretantu, Curoil ta informá ku e periodo di “Flush Out” na Kòrsou pa tantu Mogas komo Ultra Low Sulfur Diesel a finalisá. Komo tal, entrante mart 2024, komunidat di Kòrsou ta risibiendo pa 100% kombustibel segun spesifikashonnan nobo.
Pa loke ta trata Boneiru, entrante aprel benidero, Boneiru tambe lo ta risibiendo pa 100% e kombustibel (Mogas i Ultra Low Sulfur Diesel) segun spesifikashonnan nobo.
Spesifikashonnan nobo di kombustibel ta basá riba investigashon di SGS INSPIRE.
Manera informá anteriormente, e spesifikashonnan nobo ta basá riba un investigashon ekstenso ku e keda hasí pa SGS INSPIRE, un kompania eksperto den análisis di merkado di energia, den kual a tene kuenta ku entre otro e komposishon di e flota di vehíkulo na Kòrsou i standardnan internashonal. E grupo di trabou ku a keda enkargá ku e trayekto pa yega na spesifikashonnan nobo di kombustibel a konsistí di un grupo diverso di ‘stakeholders’; Curaçao Car Dealer Association, Curaçao Heavy Equipment Association, Sindikato Transporte Uní, Representantenan di pòmpnan di gasolin (Asogas, Copda, Vanddis), Curoil, Bureau Telecommunicatie & Post, Ministerio di Salubridat, Medio Ambiente i Naturalesa (GMN) i Ministerio pa Desaroyo Ekonómiko (MEO).
Pa loke ta trata e spesifikashonnan nobo, t’asina ku si kompará e spesifikashonnan di e kombustibel nobo ku e spesifikashonnan di e kombustibel ku tabata importá anteriormente, por tuma nota di algun kambio importante. Por ehèmpel, e kantidat di sulfur den tantu Mogas komo Diesel a baha konsiderablemente, di 1000 ppm pa 30 ppm (Mogas) i di 500 ppm pa 15 ppm (Diesel). Pa informashon mas detayá di e spesifikashonnan nobo stipulá pa Gobièrnu di Kòrsou, bishitá e wèpsait di BTP.
E aspekto di kontrol di kalidat i pa garantisá ku Curoil ta importá kombustibel segun spesifikashonnan vigente, tur kargamentu di kombustibel ku Curoil importá, ta keda di tèst pa un kompania di inspekshon independiente. E rapòrtnan di kalidat ta keda entregá na BTP i tambe ta disponibel riba wèpsait di Curoil.
Ademas di esaki, Gobièrnu di Kòrsou ta den e proseso pa instituí un instansia ku den futuro lo keda enkargá ku kòntròl di kalidat riba un base regular na e diferente puntonan den e kadena di distribushon, for di tankinan di CRU te ku na pòmpnan di gasolin.
