WILLEMSTAD – Minister-presidente, i alabes Minister di GMN suplente, Gilmar Pisas awe den un komunikado di prensa ta informá komunidat tokante di e subida di kasonan di Covid-19 i ‘Influenza’ (grip) aki na Kòrsou.
Pisas: “For di algun siman kaba por a konstatá ku tin un kantidat di persona ku ta sufri di kehonan di influenza (‘grip’), fèrkout, i tambe Covid-19. E ta konosí ku den e temporada di fin di aña, kual ta e kaso pa vários aña kaba, nos ta mira mas kaso di Influenza i fèrkout den nos komunidat. E aña aki nos a mira un subida tambe den sirkulashon di e vírus di Covid-19 i tin vários persona ku a bira malu di esaki. Tin informashon di algun kaso ku mester a keda interná den hospital pa ku problemanan respiratorio. E situashon ta bou di kòntròl te ku awor aki.”
Ta di sumo importansia pa tur hende ku ta forma parti di nos komunidat por keda alerta i keda apliká nos responsabilidat den e esfuerso pa nos huntu por manehá e situashon aki, minister-presidente ta bisa.
“E subida di kasonan di Covid-19 i Influenza tin Gobièrnu su atenshon, debí ku kada un persona ku bira malu, sea ku síntoma leve òf pisá, ta unu di mas pa Gobièrnu di Kòrsou. Sinembargo, e situashon aktual no ta di tal magnitut ku nos mester tuma medidanan pisa komo Gobièrnu. Nos ta kere fuertemente den e forsa i konsientisashon di kada individuo ku ta karga su propio responsabilidat i e solidaridat ku mester tei un pa ku otro, pa asina nos por yuda frena e sirkulashon di e vírusnan aki.”
Pisas ta urgi tur hende pa nos sigui apliká e tipo di medidanan di prevenshon, manera entre otro laba man regularmente, usa tapaboka, tene distansia sosial, i no bishitá hende vulnerabel si bo ta kargadó di e vírusnan aki. Kada siudadano ta hunga un ròl importante den prevenshon di mas kontagio.
“Nos ta hasi un yamada tambe na nos komunidat pa bakuná kontra Covid-19 i Influenza. Bakunashon ta un paso esensial den protekshon kontra malesa, espesialmente pa esnan mas vulnerabel i e ta evitá ku un persona por haña komplikashonnan severo despues di infekshon pa motibu di un di e vírusnan aki. Huntu nos por superá e kontagio i ola di grip ku tin aktualmente. Duna bo aporte i ban kolaborá huntu pa un Kòrsou salú i seif pa un i tur.”
