Dr. Chalabi otro yu di Kòrsou profeshonal destakando
HULANDA.- Ta parse ku pashèntnan ku ta sufri di kanser na stoma i slokdarm ta rospondé hopi bon na un tratamentu nobo, asina e instituto di kanser hulandes, ku a kondusí un estudio riba e tereno aki ta indiká.
E estudio ta basa riba kombinashon di tratamentu promé ku operashon, esei a resultá ku serka mayoria di e pashèntnan e tumor a bira hopi mas chikitu òf asta a disparsé. E estudio a tuma lugá, riba un base chikitu, na Antoni van Leeuwenhoek ku ta e departamentu spesialisá den kanser na Amsterdam.
Den e fase 2 di e estudio, investigashon PANDA, un total di 20 pashènt ku kanser a risibi un kombinashon di terapia. Nan a kuminsá ku un parti di terapia imunológiko ku e droga/remedi atezolizumab sigui pa kuater parti di terapia imunológiko di atezolizumab miéntras ku nan ta hañando kimoterapia. 14 di 20 pashènt a respondé hopi bon na e tratamentu. Den 9 kaso e tumor asta a disparsé por kompletu. Kasi kuater aña despues di e tratamentu mayoria pashènt di kende a tumornan a bira mas chikitu ainda ta liber di kanser.
Pashèntnan ta tolerá e tratamentu bon, nan a eksperensia algun efekto sekundario leve. Solamente un porsentahe chikitu a eksperensia efektonan mas severo.
E estudio ta mustrando resultadonan hopi prometedor indikando ku e tratamentu aki ta efektivo pa pashèntnan ku tin kanser na stoma. E kombinashon di tratamentu ta parse di por habri porta pa posibilidatnan nobo pa tratamentu di diferente tipo di kanser, asina e lider di e tim d investigashon dr. Myriam Chalabi a duna di konosé.
Myriam Chalabi ta yu di Kòrsou. E ta onkólogo. E loke ta hasi e estudio aki algu úniko ta e echo ku pashèntnan ta risibi e promé porshon di terapia imunológiko sin ku simultaniamente nan ta haña kimoterapia. Esei aparentemente a kondusí na mihó resultado ku estudionan similar den kombinashon ku kimoterapia i terapia imunológiko.
