WILLEMSTAD.- Doño i alabes shofùr di e vehíkulo ku a pone ‘fever’ rònt di pòmpnan di gasolin na Marie Pampun a bai entregá su mes na polis. Su vehíkulo tambe a keda konfiská.
Polis ta informá ku manera anunsiá dia promé di desèmber último nan no ta tolerá ponementu di ‘fever’ i pustamentu di vehíkulonan riba kaminda públiko ni na lugánan ku ta forma peliger pa tersera.
Den dianan benidero e kontròlnan riba entre otro e komportashonnan iresponsabel aki ta bai kontinuá i intensivá i lo tuma medida severo kontra esnan ku ta hasi nan mes kulpabel na ‘fever’ i pustamentu o ta neglishá e atvertensianan duná dor di polis.
Den oranan di atardi, doño i alabes shofùr di e vehíkulo aki, un Dodge Charger koló blanku ku tabata pone ‘fever’ i ku tabata bisto riba medionan sosial, a bin mèldu ku su vehíkulo na polis i esaki a keda konfiská inmediatamente.
Polis ta bai kontinuá ku e investigashon den e kaso aki i ta buskando dos vehíkulo mas ku tambe tabata pone ‘fever’.
EXTRA a komprondé ku e otro ponedónan di ‘fever’ tambe ta konosí pa polis i nan tambe polis ta pidi pa nan mes bai entregá ku nan vehíkulo na warda.
Ta netamente ayera EXTRA a publiká kon rabiá siudadanonan ku a eksperensiá e ponementu di ‘fever’ aki tabata. Nan a sinti ku polis no ta hasiendo nada. Pero e pone shofùr a bai ku su vehíkulo warda i awor ta sperando e otronan. Nos a komprondé ku si e otronan mes no bai warda, polis mes lo bai buska nan.
