PARAMARIBO – Den un avion di Surinam Airways ku destinashon Amsterdam, polis di Sürnam a haña kasi 600 kilo di kokaina djárason último. E droga tabata skondí den 17 kaha den un espasio den e avion bou di e ‘cockpit’, segun un unidat di droganan speshal di polis.
Téknikonan di Surinam Airways a risibí un notifikashon di “un iregularidat” den e avion i nan a bai investigá. Despues ku e droganan a ser topá, e Bestrijding Internationale Drugs Team (BID-team) di polis a ser yamá. E avion a sali ku hopi atraso for di Internashonal Johan Adolf Pengel.
Algun dia pasá, Hulanda i Sürnam a anunsiá ku nan kier traha huntu pa enfrentá tráfiko di droga entre nan. Ofisialnan di duana di ámbos pais lo bai sigui entrenamentu huntu i kambia informashon tokante métodonan di trafikashon di droga.
Hulanda a interseptá 523 kilo di droga for di Sürnam añanan pasá. Un aña promé, esaki tabata ainda 1187 kilo.
