WILLEMSTAD – Apénas benta di vürwèrk a kuminsá ku ya kaba anterior na esaki, den mardugá di dos dia di Pasku, e promé kiebro den kònteiner di vürwèrk a tuma lugá. Riba Kaminda Hensley ‘Ban Ban’ Meulens deskonosínan a bai ku un kantidat konsiderabel di vürwèrk for di e lugá na unda vürwèrk ta keda almasená. E práktika aki último añanan ku regularidat ta bini bèk.
Aparte ku e ta un echo kastigabel, pa motibu ku ta trata aki di kiebro/ladronisia, e ta un peliger tambe ya ku no ta konosí ku kua propósito e vürwèrk nan aki ta keda hòrtá.
Ta bini aserka tambe ku kisas esnan ku ta hòrta e vürwerknan aki, no ta tuma e medidanan apropiá na momentu di warda nan, pa evitá un posibel desgrasia òf te asta un desaster.
Polis ta hasi un yamada na promé lugá na doño di establesimentunan ku ta bende vürwèrk, pa tuma tur medida di prekoushon i seguridat posibel, pa evitá ku fásilmente robo ta tuma lugá na bo sitio(nan) di almasenahe di vürwerk.
Na komunidat general, e petishon pa no kumpra vürwèrk hòrtá ya ku bo tambe ta kometiendo un echo kastigabel. Alabes polis ta pidi bo koperashon pa si bo sa algu di e kiebro aki òf tin informashon di persona(nan) ku ta bende vürwèrk prosedente di ladronisia, pa avisá polis mesora.
