Falta di sufisiente polis pa traha ta serio
WILLEMSTAD.-Polisnan tambe a drenta akshon awe mainta. Un grupo di polis a bai sede di NAPB pa reklamá situashonnan ku nan ta konfrontando. Miembronan di e sindikato ta eksigiendo klaridat despues ku mando polisial a stòp trahamentu di overtaim.
Polisnan ta mustra ku e falta di sufisiente polis pa traha ta hasi e situashon sumamente difísil. Esaki ta nifiká entre otro ku na momentu ku un polis pidi asistensia ta difísil pa esei sosodé i meskos ta konta pa investigashonnan ku ta tumando lugá. Debí ku no tin sufisiente polis ta pone ku esakinan ta bai tuma mas tantu tempu. Aparentemente polisnan ta bastante demotivá i ta eksigí klaridat di minister di hustisia sr. Hato.
Polisnan ta reklamá ku gobièrnu i tim di maneho ta pone maksimo na kantidat di ora ku un polis por traha overtaim anto si mester surpasá e kantidat di ora mester bai pidi aprobashon di tim di maneho. Di otro banda tim di maneho si por instruí un polis pa sigui traha anto si e ninga di kumpli ta konsiderá esei ku el a falta ku su trabou. Awor aki no tin sufisiente polis pa traha pues no por garantisa seguridat den pais. Mas detaye den edishon di Extra.