WILLEMSTAD.- Avion ofisial di Volodymyr Zelensky tabata na Kòrsou anochi pasá. Avion di presidente di Ukrania a hasi un stòp pa karga fuel na Hato, pa despues sigui su biahe pa Washington. Na Merka tabatin kombersashon entre Zelensky i presidente Merikano Joe Biden tokante sosten prolongá di guera na Ukrania.
Zelensky a yega for di Buenos Aires kaminda el tabata invitá pa ser presente durante instalashon di presidente nobo di Argentini, Javier Milei. Tabata promé biaha ku Zelensky tabata na Suramérika for di invashon Ruso.
Aeropuerto di Kòrsou a keda sera pa públiko na dos or di mardugá. Airbus A319 a aterisá pa 02.33 or i a keda un ora i binti minüt na pista, kai bou di gate 4.
Durante e momentu di karga fuel, un outo di bombero di aeropuerto tabata na banda di e avion, tambe tabatin tres SWAT-jeep i personal di seguridat di aeropuerto.
