WILLEMSTAD.- Algun kas den bario di Nieuwpoort for di 30 di novèmber no tin koriente. Esaki ta falta di problema den un transformatòr.
Dos abitante di Nieuwpoort ta splika EXTRA ku te ainda Aqualectra no a drecha e transformatòr, pa motibu di un disputa ku Santa Barbara Plantation tokante e kostanan pa e reparashon.
E abitantenan a tuma kontakto ku Santa Barbara Plantation i tambe Aqualectra diferente bia. “Pero e úniko kontesta ku nos ta haña ta ku nan ta den deliberashon tokante drechamentu di e transformatòr.”
“Pa 11 dia nos no tin koriente”, un di nan ta bisa. Kasnan den e bario – ku ta riba tereno di Santa Barbara – no ta haña awa via ret; kasnan tin un pòmp pa nan awa. Pero esaki tampoko no ta funshoná sin koriente. Ku ta nifiká ku e abitantenan ta sin awa i koriente pa 11 dia largu.
Segun e abitantenan te ainda Aqualectra i Santa Barbara no a yega na un akuerdo tokante reparashon. “Nos no ke warda hopi tempu mas. Nos a bira víktima di un disputa entre dos organisashon.”
E dos abitantenan a manda EXTRA portrèt di e transformatòr i duna un splikashon di e problema. Ta parse ku den e último luna diferente bia Aqualectra a drecha sierto kos den e transformatòr. Diferente bia a kambia suichnan. “Pero dia 30 di novèmber 6 or di atardi a tuma lugá un korto sirkuito, i for di e momento nos no tin koriente mas.”
PORTRET
E transformatòr dañá riba tereno di Nieuwpoort.
