BOGOTA, AP.- E presidente nobo di Colombia, Ivan Duque a firma un dekreto ku ta prohibí e pueblo pa karga kantidatnan chikitu di mariwana i kokaina, den un intento pa redusí e konsumo di droga den e pais suramerikano. Kortenan a bisa ku e poseshon aki no mester wòrdu kastigá.
E dekreto ta outorisá polis pa registrá personanan i konfiská kualkier droga den esaki su poseshon. E infraktornan lo haña un but.
Benta i eksportashon di e droganan aki ta ilegal na Colombia. Sinembargo, leinan a bira mas fleksibel desde komienso di siglo i tribunal máksimo a permití pa kolombianonan karga kantidatnan chikitu di mariwana i kokaina.
Duque a bisa ku e medida nobo lo protehá muchanan di trafikantenan ku ta bende droga serka di skolnan. Pero e krítikonan di e medida ta argumentá ku e desishon aki ta afektá libertat di individualnan.
