Vershon polisial:
WILLEMSTAD – Djabièrnè 20 di òktober 2023 alrededor di 02.44’or, Sentral di Polis a dirigí un unidat di warda di polis di Otrobanda pa un adrès na Americaweg, na unda 3 ruman hòmber tabata bringando ku otro.
Na yegada di e unidat nan a topa un di e rumannan ku hinká na su lomba i garganta i ku un pòls basta suak. Mesora a pidi presensia di ambulans pero na su yegada ya no por a hasi nada mas pa e víktima.
Alrededor di 04.00’or dòkter di polis a konstatá morto di e hòmber Ramiro Inaro Obispo di 61 aña di edat nasé na Kòrsou.
Un otro ruman hòmber ku tambe tabata enbolbí den e bringamentu, tabatin hinká na altura di su garganta i kabes i a keda transportá ku ku urgensia ku ambulans pa Sala di Emergensia di C.M.C pa tratamentu médiko.
E ruman sospechoso R.H.O. di 58 aña di edat nasé na Kòrsou ku a maltratá su dos rumannan, ainda tabata na e sitio i a keda detené
A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.
WILLEMSTAD – Awe den oranan di mardugá un problema entre tres ruman a bin eskala pa bin terminá den otro kaso di asesinato. Tabata alrededor di 3or di mardugá ku polis mester a akudí ku urgensia pa Americaweg. Promé informashon ta indiká un ruman ku lo tin problema mental mester a hinka i maltratá su rumannan ku palu. Unu a fayesé na e sitio mes i e otro a keda transladá pa CMC pa tratamentu médiko. E ruman sospechoso a keda detené. Bosero polisial Rosalina tambe tabata presente na e sitio di e krímen i a konfirmá ku un ruman a fayesé i e otro ta na CMC. Tambe ku e ruman ku a keda detené ta esun mas chikí. Extra ta keda pendiente pa e informashon ofisial di polis ku nòmber di e víktima.
Bosero Polisial Maurits Rosalina
