WILLEMSTAD.- Tres fundashon pa bienestar di kachónan na Kòrsou ta uni nan man den e lucha kontra e kantidat enorme di kachó ku ta nase indeseá, i e sufrimentu di e animalnan ku ta bini huntu ku esaki.
Entrante awe i te ku 1 di yüli 2024, Rescue Paws Curaçao, Stichting Dierenhulp Curaçao i Stichting DOG ta lansa un kampaña, den kual doñonan di ménos rekurso por laga chep nan kachó pa Naf. 30,- i risibí sterilisashon òf kapamentu di nan kachó grátis huntu ku esaki. Esaki ta marka un paso di adelanto grandi den e esfuersonan pa redusí e kantidat di kachó sin doño, y asina promové bienestar di animalnan aki na Kòrsou.
E inisiativa aki ta den kombinashon ku e lei pa bienestar di animal na Kòrsou – na vigor for di 1 di yanüari 2023 -, den kual ta indiká ku tur kachó mester ta di chep entrante 1 di yanüari 2025.
Pa e motibu aki, e proyekto aki no ta solamente enfoká riba sterilisashon i kapamentu, pero tambe riba e chep i registrashon. E meta ta pa hasi e medida obligatorio aki alkansabel pa doñonan di ménos rekurso.
Ku sosten di komunidat i den akuerdo ku e lei pa bienestar di animal, e fundashonnan kier manda un mensahe fuerte: “Mester stòp e oumento di animalnan indeseá, i na moda di bisa: Sera e kranchi aki.” Segun un bosero di e proyekto. “Kachónan por haña 2 nèshi di yu pa aña, tin biaha asta ku 10 yu di kachó òf mas. Pues un promedio di 20 kachó por keda trese na mundu for di e kachó aki kada aña. I despues di 6 luna, esnan ku a bira grandi, ta sigui reprodusí…. y asina ta sigui. Ku sterilisashon i kapamentu na gran eskala, nos ta spera di por redusí e sufrimentu di animalnan na Kòrsou i baha drástikamente e saldo di di kachónan indeseá”, e bosero ta sigui bisa.
E proyekto ta wòrdu hasí posibel pa medio di kolaborashon ku diferente dòkter di kachó, manera Veterinary Centers Kòrsou i Veterinary Clinic Alablanca.
Doñonan ku tin interes pa hasi uso di e kampaña aki te ku 1 di yüli 2024, por manda un Whatsapp na un di e numbernan indiká di e fundashonnan partisipante. Despues di esaki lo risibí un sita pa por laga chep, registrá i sterilisá òf kastra nan kachó grátis.
Rescue Paws Curaçao: 522-5262
Stichting Dierenhulp Curaçao: 561-7171
Stichting DOG: 686-0868
