SAN JUAN, PUERTO RICO, AP.- A registrá 17 asesinato den diferente insidente na Puerto Rico entre djaweps i djasabra, loke ta representá e sifra mas haltu durante e fin di siman último. Asina polis a informá djadumingu.
Ku e 17 mortonan registrá for di djaweps, tin 331 asesinato durante 2016, 20% riba e 276 asesinatonan ku a tuma lugá den e mesun periodo di e aña anterior, segun konfirmashon di e superintindente di polis, Jose Caldero.
Por lo ménos seis tabata kometé den San Juan i munisipionan mas chikitu.
Caldero a hasi e anunsio den un konferensia di prensa reuní di forma spesial, pa papia riba e ola di violensia i oumento di asesinato.
El a splika ku mayoria asesinato ta relashoná ku droga, ounke tambe a registrá 45 asesinato pa violensia di género i konfliktonan familiar.
Loke ta preokupá polis, segun Caldero ta, ku e violensia a ekstendé den zonanan normalmente mas pasífiko, manera e dòbel asesinato ku a tuma lugá djaweps na Gurabo, kaminda un hòmber di 27 aña i su yu muhé di 6 aña tabata asesiná, na momentu ku nan tabata transitá den un outo.
E mucha tabata di bishita na Puerto Rico, debí ku e ta biba ku su mama na Merka.
