Reglanan strukturá ora tei biaha ku menor

Den kuadro di protekshon di menornan di edat, ministerio di hustisia a strukturá e reglanan pa ora ta biaha ku menor di edat. I den e kuadro aki Djasabra a papia ku Daniella Victorina di Beleidsorganisatie Ministerio di Hustisia i Nathaly Nahr di Voogdijraad/UOJZ. Nan a duna un splikashon amplio di tur loke mester tene kuenta kuné ora ta biaha ku menor di edat i mas ainda ku fakansi ta den kurpa. E reglanan ta drenta na vigor dia 1 di yüli awor.

Kon biaha ku un menor

Segun Daniella Victorina, e reglanan aki tabat’ei kaba pero nan a keda strukturá i a hinka nan den un maneho. Lei ta deskribí ken ta un menor. Tur hende ku ta bou di 18 aña ta un menor di edat. E artíkulo di lei ta bisa ku un menor di edat no por hasi transakshon legal sin outorisashon di su mayornan, i mester konsiderá un biahe komo un transakshon legal i e menor mester di outorisashon di su mayor. Semper ku un menor ta biahando, imigrashon tin di kontrolá si e tin aprobashon di su mayornan si e no ta biahando ku nan (sea esun òf otro ku tin e outoridat aki). Lei ta bisa un mama ku no ta kasá, ora e haña yu ta e tin e outoridat legal riba e yu. Na momentu ku e tata rekonosé e yu, ainda e mama tin outoridat legal, ta ora e tata bai korte pe haña outoridat legal, te ora ei e ta hañ’é. Si e  tata hasié, ora e mama ta biahando e mester demostrá ku e tin outorisashon di e tata. Si e  tata no a bai korte ainda i no tin outoridat legal, si e ta biaha ku e yu e mester tin outorisashon di e mama. E tipo di kosnan aki a keda reglamentá ku na momentu ku ora mester di outorisashon di esun ku outoridat ta yena un formulario ku a remplasá e karta. Den e formulario ta pone tur e rekisitonan ku ta nesesario pa e yu por biaha. Huntu ku e formulario tin di pone e identifikashon nesesario pa ora yega imigrashon por mira ku ta ken tin outoridat i por pasa ku e yu.

Formulario

E formulario ku Daniella a referí na dje ta splika presis kua informashon mester i tambe kua dokumento tin mester i asina e hende mes no tin di skibi e karta. E formulario lo bai ta disponibel riba wèpsait di gobièrnu i di imigrashon. Teniendo na kuenta ku 1e di yüli e reglanan ta drenta na vigor ta nifiká ku promé ku e fecha aki e formulario lo tei disponibel. Promé ku a yega na e formulario a deliberá ku tur e departamento konserní pa tur kos ta bon reglá.

Outoridat legal na korte

Un manera pa demostrá ken ta mayor di e yu segun Daniella ta pa medio di un akta di nasementu. Pero pa demostrá ken tin outoridat legal, esei ta na korte tin registro. Maske e mayor tin e akta di nasementu, e no ta bisa ken tin outoridat pero ta bisa solamente ken ta mama i tata. Por ehèmpel den kaso di divorsio wes por a bisa kua di e mayornan tin outoridat òf kisas ta tur dos tin e mesun outoridat. Nada di esei bo ta haña riba e akta di nasementu i p’esei mester di e dokumento di korte. E kopia di e gezag register ta e dokumento ku ta haña na korte. Na momentu ku ta bai biaha ku un mucha, sea ta mama òf tata, mester di e dokumento aki di korte. Daniella a sigui splika ku ora hende tende korte, ta krea e impreshon ku ta un kaso tin di bai hasi. Esaki no ta kuadra. Ta trata di un petishon ku ta hasi, ta dura 7 dia di trabou pa haña e dokumento i paga 50 florin.

Reglanan mas skèrpi

Dikon a hasi e reglanan mas skèrpi? Daniella a splika Djasabra ku hopi bia ta haña mayor ta pensa ku ta su yu i no ta realisá ku e sa ku ta su yu pero otro hende no sa. E reglanan aki ta implementá na imigrashon aki na Kòrsou pero ora yega Merka, Ulanda òf kualke parti di mundu nan ta kontrolá. I p’esei ta importante pa sali bon prepará. I no ta konta solamente pe mayor ku ta biaha ku e yu pero kisas un tanta por ta bai keiru ku e yu. Riba e punto aki Nathaly Nahr a splika ku tin bia por ta un tanta òf un tersera persona tin tutela di e yu i mester tin dokumento na òrdu pa proba ken tin kustodia di e yu. Den un kaso asina tambe ta e dokumento di korte mester pa proba ken tin outoridat riba e yu pa por biaha kuné.

Mayor no ke kooperá

Den kaso ku mama i tata tin outoridat riba e yu, pero un ke bai afó ku e  yu kisas pa un kaso di emergensia pero e otro no ke pa esun bai ku e yu. Den un kaso asina Nathaly a splika ku den kaso ku di e mayornan no ke kooperá, nan mester hasi petishon na korte pa un kaso. I den korte ta splika i mira si korte por remplasá e outorisashon. Un kaso ta tuma tempu òf e mayor por entamá un huisio sumario. Daniella a bisa ku kasonan di famia por dura kòrtiku pero mester proba e urgensia. I den kaso di un persona ku a bin biba Kòrsou sin e tata. Si e mama ke sali ku e yu, Daniella a bisa ku mester tene na kuenta ku for di momentu ku e mama a inskribí e yu na kranshi e mester a demostrá ken tin outoridat. Den un kaso asina e informashon na kranshi ta sufisiente. Den nan kaso nan por demostrá e outoridat pa medio di e Lange Uitreksel.

Reglanan entrante 1 di yüli awor

Daniella i Nathaly ta ferwaktu ku ta bai haña problema ora e reglanan keda implementá di forma struktura dia 1e di yüli awor. Esaki pasobra entre otro loke ta eksihí ta pa e dokumentonan ta mínimo seis luna i esei por trese e persona ku na último momentu a disidí di ke bai ku e yu, kisas e no tin e. E por trese frikshon i p’esei ta lansa un kampaña strukturá pa tur hende tin informashon i pa prepará delantá i tambe pa kranshi ta prepará. Nan ta preparando pa fasilitá mas tantu posibel. Dor di duna informashon i struktura ta fasilitá e hendenan pasobra nan ta informá di kiko tur mester. I tur esaki segun Daniella ta pa protekshon di e menor finalmente. Kisas ta reglanan ku hende no a para ketu na dje i ta hasi hende inkómodo pero dunando tur informashon e hende ta prepará.

Kontrolá na imigrashon

Na momentu ku yega airopuerto, tur dokumento ta keda kontrolá na imigrashon. Segun Daniella nan a kuminsá prepará e ámtenarnan di imigrashon riba e maneho mas strukturá. Ta algu ku nan tabata kontrolá kaba. I p’esei ta importante pa mantené na e maneho pasobra e hende sa kiko e por ferwaktu. P’esei mes a formulario yega. Dor di mantené na e proseso, tur kos lo kana lihé tòg. Daniella a pone énfasis ku nos ta papia aki di regla i no lei i por trese kuné ku kisas ta pidi pa un lange uitreksel pero e hende tin un akta i nasementu. Kisas e dokumento ta diferensiá pero tene na kuenta ku e ta tuma mas tempu pa imigrashon kontrolá. I p’esei ta konsehabel pa sòru pa tur kos i tur dokumento ta manera e reglanan ta bisa.

Ròl di Voogdijraad

Pa loke ta e ròl di Voogdijraad den e struktura aki Nathaly a splika ku Voogdijraad a uni ku tres otro instansia ku ta Slachtoffer hulp, AJJC i Gezinsvoogdij Instelling i a bira Uitvoering Organisatie Justiciele Zorg. Nan parti ta ku nan ta traha ku menor i pa protehá nan mas tantu posibel i evitá ku kosnan ta kana robes den kaso di entre otro kontrabanda. E mucha ta keda inosente i e hende grandi tin di sòru pe. Voogdijraad tin kasonan tambe di por ehèmpel muchanan di 17 aña i 6 luna ku tambe ke bai afó, kisas pa bai studia. Voogdijraad tin di traha un karta ku no tin opheshon. Sin dje no por kita nòmber for di kranshi. P’esei ta importante ora e yu ta bai biaha i e tin 17 aña i 6 luna tin algun dokumento di entre otro serka ken e ta bai na Ulanda, un karta legalisá ku e persona ta di akuerdo pa e mucha bai serka dje te ora e mucha ta mayor di edat. Ku tur e dokumentonan ei i tambe dokumentonan di e menor i e mayornan ku tin kustodia, Voogdijraad ta traha un karta ku no tin opheshon. I ku esei e por kita nòmber na Kranshi. Esaki tabata asina aki semper ounke no semper el a kana bon. Tin hende no tin informashon òf falta rekisito òf karta na Ulanda no ta legalisá i p’esei ta tene duru na e maneho. Tur e informashonnan aki ta disponibel riba e Facebook di Voogdijraad Kòrsou. Tambe na nan ofisina tin formulario meskos ku na kranshi. Den e kuadro aki tambe ta hasiendo e pueblo konsiente pa kuminsá tempran. Awor aki ta dependé di e munisipionan na Ulanda pa sa kon largu e proseso ta dura. Tin algun munisipio ta kana lihé pero tin otronan ta un pa dos luna. Hopi biaha e proseso por stanka debí na dokumentonan ku tin di bini for di Ulanda. I p’esei ta rekomendá mayornan pa kuminsá kana e kaminda tempran.

Prosedura pe yu menor ku 17 aña i 6 luna

Den kaso ku e menor ta ménos ku 17 aña i 6 luna, nan prosedura ta kompletamente otro i ta dura mas largu. E prosedura ei, nan ta pidi mayornan pa no warda te ora tende ku e yu a  slag na skol pa kuminsá ku e proseso pasobra den e kaso aki ta Tijdelijke Voogdij tin di duna. Den e kaso aki mester manda pidi Raad Voor Kinder Beshcerming den e siudat kaminda e mucha ta bai keda pa hasi investigashon serka e persona ku ta bai haña e kustodia temporal.  Tin kaso ku e raad tin 4 luna di espera. I ta spera ku e resultado ta positivo sino e mayor tin un chèns pa buska otro kustodia temporal pa e yu. I ora haña kontesta di e raad na Ulanda, mester manda e petishon pa Korte aki na Kòrsou. Den e kaso asina aki no ta bin tratamentu apart pero ta duna un desishon pafó di un kaso. Ora e desishon sali e ora ei por bai kumpra pasashi i bai Voogdijraad bèk kuné pa haña e pèrmit pa kita e yu su nòmber na Kranshi.

Bèk riba avion

I si e persona logra pasa imigrashon na Kòrsou sin su dokumentonan na òrdu i e yega Ulanda, nan ta bir’é i mand’é bèk Kòrsou, segun Daniella a splika Djasabra. Pero mesun kos un mucha di Ulanda por yega Kòrsou tambe sin su dokumentonan tabata na òrdu i aki tambe ta pone nan riba avion bèk. E tipo di kosnan aki sa sosodé i ta sosodé asta mas ku por kere. I no ta nada dushi pa pone un menor òf kisas asta henter e famia bèk riba avion. Pero mester tene kuenta ku e konsekuensianan ku esaki por trese kuné i p’esei ta importante pa implementá i tene na e reglanan manera nan ta.

Tene kuenta

Rekisitonan pa biaha ku un menor ta;

Akta di nasementu,

Dokumento di gezagregister pa demostrá ken tin outoridat legal riba e yu,

Formulario,

Pasaporte/sédula pa identifiká.

Esakinan pa simplemente e biahe por ta plasentero i protehá/bienestar di e menor di edat.