BUENOS AIRES, AP.- Rusia, e último pais estranhero ku ta kolaborá ku teknologia haltu den lokalisashon di e supmarino argentino ARA San Juan, a retirá di e búskeda di 44 tripulante den e supmarino ku a pèrdè den novèmber.
“E kolaborashon internashonal di Federashon di Rusia a finalisá i e barku argentino di Isla Malvina lo keda na kargo di e búskeda aki”, asina e bosero di Armada, Enrique Balbi a bisa na The Associated Press.
E desishon di gobièrnu di Vladimir Putin a generá frustrashon entre famianan di e tripulantenan di e supmarino pèrdí desde mas di kuater luna den awanan di Atlántiko sùit.
Rusia tabata kolaborá ku e barku Yantar, kual segun Balbi ta dirigiendo pa Montevideo pa pone kombustibel i lo yega mas o ménos 7 di aprel bèk na e haf di Buenos Aires. E embarkashon tabatin vehíkulonan operá ku remote kual por a sumergí den awanan i asina visualisá ophetonan den esaki.
E supmarino diesel eléktriko klase TR-1700 di fabrikashon aleman i den operashon desde aña 80 a disparsé dia 15 di novèmber na momentu ku e tabata nabegá desde Ushuaia, den ekstremo sùit di Argentina, rumbo pa su base na Mar del Plata, 400 kilometer na sùit di Buenos Aires. Armada a deskartá sobrebibensia di e tripulantenan.
E operashon pa haña e supmarino a konta ku partisipashon di 18 nashon i desde komienso di aña Rusia tabata e úniko pais estranhero ku tabata kolaborá ku e búskeda ku ta desaroyá den un área di 4.000 kilometer kuadrat.
