WILLEMSTAD.- Parlamentario sr. Juniel Carolina ta kontentu ku porfin a bini un lei ku por hasi uso di dje pa trese struktura i organisashon den weganan di plaka i weganan di suerte i tambe ‘online gaming’. Segun sr. Carolina, mester trese órden den e asuntu di wega di plaka aki pasobra si no hasi esei e kosnan ta bai kompletamente fo’i man. Un tempu kosnan tabata asina fo’i òrdu ku tin mashinnan di plaka skondé den tualèt na snèk pa evitá ku ta haña esakinan ora ku MEO bai kontrolá. Mester pone kosnan na òrdu si, segun Carolina. Ta tur dia por pasa mira hendenan ta tira sèn den mashin. Den e kaso aki e operador, doño di tienda/snèk ta gana i gobièrnu mes no ta risibí niun depchi.
Segun e parlamentario e tin di felisitá e minister di finansa pasobra ta trata aki di un mandatario ku ta hole kaminda tin ‘plaka’. Nos ke hasi yen kos, i tin di tene kuenta ku sin plaka tin hopi kos ku bo no por hasi. I den e mundu di gèmbelmentu tin masha hopi plaka ta lora, i si nos tin un minister ku por trese òrdu i organisá e sektor aki i ku ta trese miónes den kaha di gobièrnu, e no sa ken lo por ta kontra e proyekto di lei ku tin na kaminda pa hinka weganan di hazar den un bachi legal?
Mas aleu el a splika ku, e no ta kontra dje lei aki pero ta importante pa atendé kuné manera mester ta si di moda ku e no ta trese konsekuensianan negativo. Den un presentashon anterior di Trust.Nu Curaçao nan a hasi menshon di algun punto di preokupashon manera e.o. oumento di kompensashon di lisensia, kontrakshon dje ròl di kantornan di Trust, i Curaçao Gaming Authority en bes di Gaming Control Board.
Tin hopi interes pa e lei (LOK) aki ya ku tin mas ku shen kompania ku for di novèmber 2023 kaba a habri nan ‘account’ den e portal di Gaming Control Board. Entre otro esei ta relashoná ku e petishon pa un pèrmit nobo. E ta spera ku gobièrnu lo sigui traha duru pa por tin mas entrada pa kaha di gobièrnu.
Un aspekto masha importante den e totalidat ta ku, un parti dje entradanan for di e aktividatnan aki lo bai pa sostené i promové deporte i kultura. E ta algu di apresiá, pasobra tur hende ta mira kon nos deportistanan ta saka kara ku e tiki fondonan ku tin na disposishon. Pus ta na su lugá ku parti dje ganashinan lo bai pa deporte i kultura.
